Jocus Toekôms

Kiek truuk nao de vastelaovend van Jocus Toekôms

Dreejspan 2023: Prins Siem I (Wilbers) en zien Adjudante Stan Drüke en Joey de Bruin.

Jocus Toekôms Dreejspan 2023

Leef Jocusse en Jocusinne,

Gaer wille weej óch veurstelle aan d’n nieje hoeëgheid van Jocus Toekôms, Prins Siem d’n iërste mit zien adjudante Joey en Stan!

Dees kwante jonge kinne zich al sinds det zeej nog jonge blaage ware. Same hebbe zeej dan ouk Vastelaovend vanaaf kleins aaf aan gevierd, iers onder de vleugels beej Pap en Mam en later same mit eur vrinde.

Prins Siem I haet zelfs al waat ervaring mit ’t veurop gaon in de Venlose Jeug Vastelaovend. Hae is namelik beej de Koedeljach van Benders jeug broédegom gewaes. Ouk zit hae al sinds zien 12e laevesjaor beej de Raod van Elluf van Jocus Toekôms. Veur um is Prins waere van Jocus Toekôms eine druim dae oét kump!

Same trap dit dreejspan gaer taege ein belke op ‘nne Hacienda achter in ’t Ven bej FCV. Adjudant Joey hoofde neet lang nao te dinke wie hae werd gevraog um adjudant te waere daor zien naef Siem. ‘T Vastelaovend viere is eur met de paplaepel ingegaeve. Adjudant Stan hoofde ouk neet lang nao te dinke wie hae werd gevraog door Prins Siem I as adjudant. Zeej hadde namelik al aafgespraoke det, wennier ein van eur oeit prins zoel waere, zeej dan de ander zoele vraoge as adjudant.

Zeej zulle de Venlose jeug Vastelaovend veurop gaon onder eur motto:

LAOT GAON, LAOT GAON DAE WAAGE!

WEEJ ZIEN 3 VENLOSE BLAAGE.

VOETBALLE OP EIN HACIENDA IN ’T VEN

EN VIERE VASTELAOVEND MIT VUUEL JOEKS EN JEN.

2022 HEBBEN WEEJ AS DREEJSPAN GEMIS,

DAORUM HOUWE WEEJ DIT JAOR

DÖBBEL OP DAE KIS’’

VASTELAOVEND SAME!

Jocus Toekôms

Jocus Toekôms haet ziene naam en uuterlik te danke aan groët Venloosch Vastelaoves Gezelschap Jocus, taeves aldste vastelaovesvereiniging van Nederland (1842). ’t Symbool van Jocus Toekôms besteit oét ein kuuke, mit Jocus muts, waat oét ein ei kruup.

Ein vereiniging

Op Vastelaoveszôndaag, 15 fibberwari 2015, teikende Jocus Toekôms en Venloosch Vastelaoves Gezelschap Jocus ein kônvenant veur ’t samegaon van dees twië Venlose Vastelaovesvereiniginge. Vanaaf det moment wuurt Jocus Toekôms as niej kommissariaat ein volwaerdig onderdeil van Venloosch Vastelaoves Gezelschap Jocus.

D’n achtergrond veur dezen historische stap vormp ’t straeve van beide vereiniginge um de jeugvastelaovend ein nog vastere plaats in de Venlose gemeinschap te beeje. Daonaeve wuurt auk de kôntinuiteit van Jocus Toekôms gewaarborg.

As volwaerdig onderdeil van “groëte broor” Jocus hild Jocus Toekôms zien eige identiteit. De organisatiestructuur, eur logo en oprichtingsdatum waere in iëre gehalde. Op dees wiés waere de aldste Vastelaovesvereniging Jocus én de aldste Jeugdvastelaovesvereiniging Jocus Toekôms éín vereniging. Alzoë waere alle leeje van Jocus Toekôms Jocuslid.

Jocus Toekôms haet binne de Venlose jeugvastelaovend ein unieke rol as initiator en kertrekker. Vanaaf eur oprichting in 1951 haet zeej as pioneer de jeugdvastelaovend ein plaats gegaeve. De twië vereiniginge völle mekaar, mit bestaonde kinnes en ervaring aan, um de Venlose jeug aan te spraeke. Ein moei veurbaeld is de jeugdzitting “Half Haenke” die Jocus Toekôms en Jocus same organisere.

Jocus organiseert sinds inkele jaore diverse evenemente um de jeug beej de Vastelaovend te betrekke. Beejveurbeeld ‘t Jeug Vastelaoves Leedjes Kônkoer (leedjeswedstriéd veur Venlose basisschoële) en Jocus Pocus (speciale vastelaovesmiddaag in de Maaspoort veur en door de jeug) op Vastelaoveszondaag. Taeves is d’r ein hechte samewerking mit Stichting Herfshane (podium veur jônk vastelaovestalent tösse 16 en 25 jaor),

In de aafgelaupe periode hebbe twië projekgroepe, bestaonde oét leeje van beide vereiniginge ’t samegaon ônderzôch. Dein eine projekgroep haet zich gerich op de organisatorische, juridische en financiële facette. Dein andere groep haet ein kônstruktieve samewerking mit organisatie van aktiviteite oétgewerk.

Dit alles woort op Vastelaoveszondaag 2015 bekrachtig mit ein officieel moment wao-op Jocus Toekôms officieel en volwaerdig deil is gewaore van ‘t Venloosch Vastelaoves Gezelschap Jocus. Eine belangriéke stap in de historie van de Venlose Vastelaovend!

’t Kommissariaat Jocus Toekôms

Venloosch Jeug Vastelaovesgezelschap Jocus Toekôms is opgerich in 1951 en is daomit Nederlands aldste jeugvastelaovesgezelschap. De residensie van Jocus Toekôms (de zoëgeheite Hoonderstal) is gevestig in ’t Ald Weishoès, gelaege aan de Groëte Kerkstraot 31 te Venlo.