Elf van Elf / Inscheete

Op Elf van Elf wuurt ’s morges um klokkeslaag 11.11 oor ’t nieje vastelaovessezoen ingeluujd mit ’t ‘inscheete’. Vanaaf de Mert veur ’t Stadhoés bars ein daagdeurend Venloos meziékfees los, mit onder andere:

Jocus Hofkepel en de 4 winnende Jocusleedjes, Julia Beurkens, DJ Sander, Enne Bink, DJ Serpetinus, Joekskepel Nörges veur Nuuëdig, Linke Mik, Kristel en Loek. Maar auk de winnaers van ‘t JVLK Basisschoël Sint Martinus en de Herfshane, Golden Hiëring, DJ Sander, Oét de Maot en de nieje Venlose dialekband Aevel!

Neteurlik luuët auk d’n Ermen tak van Boerebroélofsgezelschap de Herfshane zich zeen. Zeej zulle same mit Vors Joeccius XI ’t nieje Boerebroélofsgezelschap 2026 van Vastelaovesgroep Beejeingeklats welkom heite.

’t Offisjeele programma boéte op de Mert deurt wiés 20.30 oor.

Ingangk via Paeperstraot – achterkant Stadhoés
D’n intree tot ’t plein is aan d’n achterkant van ’t stadhoés, ter huuëgte van ‘t Theaterhotel – via de Paeperstraot.
’t Meineme van eige drank is neet toegestaon. Heej wuurt beej binnekôms op gekôntroleerd. ’t Meineme van eige aete in beperkte maote – wie kiës, wôrs, of van de McDonald’s – is waal toegestaon.

Toilette
Taeves zien binne ’t terrein miër toilette veurzeen. De toilette achter ’t Stadhoés waere oétgebreid. Neteurlik zien auk de toilette van de umliggende horeca auk bereikbaar.

Venlo Baeker
Auk op Elf van Elf wuurt gebroék gemak van de Venlo Baeker as statiegeldbaeker. Deze is aan de barre verkriégbaar. As geej al eine baeker heb, meug geej dae neteurlik meineme. Gaer zelfs!

Jocus CD
De nieje Jocusleedjes zien vanaaf 11 november auk weer thoés te beluustere via de spiksplinternieje Jocus CD die op de vertrouwde verkauppunte verkriégbaar is en die neteurlik via de online streamingsdeenste beluusterd kinne waere.

D’n Opstaeker
Auk is vanaaf 11 november “D’n Opstaeker” verkriégbaar, de 22e editie is gemak door Maarten Grob. De opbringste van “D’n Opstaeker” kômme ten gunste van de vastelaovesvereiniginge binne de gemeinte Venlo.