Zölle weej dan nôw maar nao de broelof gaon?
‘t werk det is gebeurd
Boerebroélof
De organisasie van de Boérebroélof is veur ‘t seizoen 2023-2024 in hand van:
de Kwante Kaketoe
Veur vuuël vastelaovesvierders is de boére dinsdaag de moeisten daag van de Vastelaovend. Venlonaere die de stad oeits hebbe verlaote um zich örges anders te vestige kômme speciaal veur dit fantastische fees truuk nao ’t Stedje van Lol en Plezeer.
D’n daag begint mit de kôffietuiterie (eine gojjen baom is belangriék), waonao veuraafgaond aan de Boerebroélof-sirremonie op ‘t Venlose stadhoés ‘t gans gezelschap en idderein dae mei wilt in eine bônten broélofsoptoch door de Venlose binnestad trek.
Opstelle veur d’n boere optoch vanaaf 13:00 op de Alde Mert, aanvang 13:30. Route: Jeustraot, Kwartelemert, Hoëgstraot, Vleisstraot, Klaosstraot, Parade, Gashoésstraot, Mert. Op d’n tomp Hoëgstraot/Vleisstraot neemp ‘t Boerebroélofsgezelschap ‘t defilé aaf.
Idderein dae det wilt meug mei in d’n optoch! De ganse Mert is gevöld mit boere en boerinne as getuuge as ‘t broédspaar op ‘t bordes van ‘t stadhoés in de ônech verbônde wuurt.
Speldje veur ‘t broédspaar
Idder jaor kriege Broéd en Broédegom -van ‘t veurgaonde jaor- op de Boeremoosbal ein speldje aangebaoje van Jocus. Dit speldje guf eur ein bliévende herinnering aan eur haufrol binne de Boerebroélof. ‘t Speldje is in ‘t laeve geroope door Clim Backes in 2002 umdet hae vond det dees twië haufrolspeulers in de vastelaovend zônder ein aandinke aafschied môtte neme. Eine Prins haet beejveurbeeld zien Prinsekruuts en zien adjudante ‘t pilaere-speldje. Clim haet toen Frits Nellissen ‘t idee laote oétwerke. De speldjes waere auk aanstaonde Boeremoosbal weer aangebooje! ‘t Speldje wuurt gesponsord door Backus aan de Grens.
Bekiék de gezelschappe door de jaore haer
Zing mei!
’t Werk det is gebeurd,
Nôw zien we oëtgekneurd.
Waat hebbe weej gepaes.
De verkes zien gevoord.
De tuite zien geschoord.
Weej zien in de kuup gewaes.
Refrein:
Zulle weej dan nôw maar nao de broelof gaon
Det guf ein gooje wei.
Hebbe weej neet lang genôg al druëg gestaon
Wae geit d’r met ôs mei.
Wae neet vaerdig is dae kump ôs dan maar nao.
De boeredöchter zien al dao
En dan zulle we ens kiëke of ’t stump
Det van ein broelof ein broelof kump.
De zoog die haet gebag.
De mök dae is geslach.
De biëste zien verzörg.
De geerton is gelaeg.
’t Hoës dat is gevaeg.
De mis is weggeschörg.
Gemôlke is de geit.
De flatse zien gespreid.
Gepoets is ouk ’t paerd.
Gedaon is det gemelk.
De stal dae is gekelk
En de schop dae is gekaerd.