Gesponsorde priéze
Jocus kint ein aantal sponsore, die de vereiniging tegemoot kômme in de vorm van ein priés dae oétgereik meug waere. MGP Venlo is adoptant van de “Gruuëtse”: ein twiëtal priéze veur de moëiste groep in dein Groëte Optoch en ein veur de moëiste wage oét dein optoch.
Nellissen is adoptant van de “Funs” ein priés veur de zenger(s) van ’t winnende leedje op de Leedjesaovend.
Full Account haet d’n “Ad Pollux trofee” geadopteerd, dae jäörliks wuurt oétgereik aan de kômponis(te) en teksschriévers(s) van ’t winnende leedje op de Leedjesaovend.
MGP Venlo: de Gruuëtse
Op Oétbetaalzondaag waere de winnaers van de Groepe en Waages van de veurletsten Groëten Optoch taege inlevering van de wissel-trofee, eine iëre-staaf, ein bliévend aandinke oétgereik (det zeej meuge halde): de Gruuëtse.
Dees prachtige trofee is ôntworpe door Geert Verkoeyen en wuurt meugelik gemak door MGP Venlo, wae dan auk de iër gelaote wuurt ’t prachstök aan de winnaers te euverhendige. Veur de priéswinnende groepe en waage deilnemers is d’r zoë ein bliévende herinnering aan de succesvolle deilname aan dein Optoch. Jocus is as vereiniging biezônder gelökkig mit ’t wiéze besloét waat daomei ein stevige hand in de rök hild van de organisasie van de stadsoptoch.
Gruuëtse-troffee veur waages
Gruuëtse-troffee veur de groepe
Nellissen: de Funs
De Funs wuurt jäörliks oétgereik aan de zenger(s) van ’t winnende leedje van de Leedjesaovend. ’t Bringe van ein leedje op Jocusbuun is ein kuns. Nao dae mins, dae zoë good die kuns verstônd: ald-Prins Funs van Grinsven, is deze priés as hommage verneump.
De Funs is ein puur kunsstök van de hand van d’n hiër Ivo Nellissen van de firma Nellissen (www.nellissen.nl)
Full Account: d’n Ad Pollux trofee
D’n Ad Pollux trofee is in ’t laeve geroope en gebrach door Bert, Herm en Ad Pollux. Zeej ware van meining det de kômponiste en teksdichters van ’t winnende leedje op de Leedjesaovend te weinig aandach kreege, nao ’t winne van de Leedjesaovend. Alle iër ging/geit smeis nao de oétveurders van ‘t leedje.
Nao ’t haergaon van eure “ome Addie”, dae hiël vuuël leedjes haet geschreve, vônde zeej ’t tiéd um ‘Ome Addie’ (Ad) te iëre mit “d’n Ad Pollux trofee”.
De trofee is gemak door de Venlose kunstenaer Hay Mansvelder. De trofee is noow via ein jäörlikse beejdrage geadopteerd door Full Account (www.fullaccount.nl).