Zitplaatse Opus Jocus veur ‘n breid publiek

De 8e oétzending van de Leedjesaovend geit de geschiedenis in as de Opus Jocus wao veur ’t iërs kaarte beschikbaar zien veur ‘t breije Venlose publiek.  Jaore op riej haet ’t tot gespreksstof geleid. De Jocus’ Leedjesaovend waas op veurhand oétverkoch. Zelfs veur trouwe leeje en donateurs van ‘t Vastelaovesgezelschap leek ‘n kaertje veur deze biezondere aovend döks onbereikbaar. De iërste jaore woort d’r nog waal ‘n aopenbare verkaup georganiseerd veur ‘t geval det d’r kaertjes euver zoele blieve, maar de lange riej mit belangstellende woort jaor op jaor teleurgesteld.

Jocus haet zich ‘t kommentaar aangetrokke en gezoch nao meugelijkhede um ‘n zoë groët meugelik publiek te kinne laote meigeneete van dezen unieke meziékaovend. Behalve de live-TV- en radio-oétzending van Umroop Venlo, is ‘t programma auk euver de ganse waereld te volge op internet. ‘t Vurrig jaor haet Jocus dao naevebeej geëxperimenteerd mit extra plaatse in de theaterzaal (de groëte tribune van de Maaspaort). ‘n Experiment det tot enthousiaste reaksies haet geleid. “De meis luxe steul, prima bedeening (drenkskes waere aan de stool gebrach) en waarschienlijk wied oét ‘t beste euverzich euver de zaal en oétzich op ‘t podium. Veur 15 euro op de iërste riej!” Raeje waorum Jocus haet beslaote dit jaor de extra theaterzaalplaatse vas op te neme in de zaalindeiling.

Dit jaar zien maar leefs 261 extra plaatse in de theaterzaal beschikbaar. Heejvan zien d’r nog ‘n aantal beschikbaar veur de aopenbare verkaup. Jocus is d’rvan euvertuug det mit dees kaarte aan ‘n hertewins van vuul Venlonaere wuurt voldaon; aanwezig kinne zien beej de live-registrasie van Opus Jocus. Kaarte zien te kaup (15 euro per stök) beej Sporthoés Olympia Jan Klein.

Wae wuurt nummer 1 van Opus Jocus 2008? Zaoterdagaovend 4 oktoëber, zoë rond middernach, zal Venlo ’t weite!