Wahnsinn en Neet oét Lottum op Naopraote 2009

Wahnsinn en Neet oét Lottum zien op 25 jannewarie tiedes ‘t tradisionele “Naopraote” in de Maaspoort in Venlo de publiekstrekkers.  Neet oét Lottum mit doézendpoët Frans Pollux in eur geledere behoof nauweliks introduksie. Al jaore speult dees band op idder feesje ‘t daak d’raaf.Wahnsinn is ‘n groep van nege topmuzikante. Eur repertoire kinse samevatte as polkapower en Alpenrock waobeej alle remme los gaon. Party Power ohne ende…

‘t Naopraote, det daags nao ‘t Boeremoosbal plaats vindt, is de aafgelaupe jaore oétgegreujd tot ‘n evenement vol dans, zang en meziek. ‘t Jocusevenement begint um 14 oor en de toegang is gratis. Al wuurt ‘t drage van de nieje Opstaeker, te kaup in de Maaspoort, door Jocus ziër gewaardeerd. Euveriges zien d’r nog inkele Boeremoosbalkaarte te kaup beej Sporthoés Olympia aan de Groëte Baekstraot 1 in Venlo.

Naeve Wahnsinn en Neet oét Lottum haet ‘t Naopraote dit jaor ‘n hiel moëi programma. Netuurlik zal ‘t nieje boerebroelofsgezelschap van de Meulewiekers, mit in eur midde ’t broédspaar Joyce en Pieter, zich aan ‘t publiek prissentere. Maar auk niej talent zal van zich doon spraeke. Zoë zulle de Herfshane weer van de partiej zien en guf de winnaer van ’t Jocus Jeugsvastelaoveskonkoër, de kinder van de Greunveldschoël, acte de presence. Netuurlik kin ‘t publiek weer geneete van de veer winnende Jocusleedjes en zulle ook de winnaers van Tegele en Bliërick eur nieje vastelaovesschlager laote huure. De muzikale umliesting is in hand van de Hermeniekepèl.

De prissentators zien Ruud Stikkelbroeck en Jack Schattorjé.