Wae zông det leed: Mieke Stevens

In ein gezellig huuske in Baolder ligge veur mich inkele schrifjes op taofel, schrifjes waorin Mieke Stevens-Didriëns alle kranteknipsels, leedjesbukskes en andere tasbare herinneringe vanaaf 1975  haet bewaard.

Mieke speulde as kind altiéd mit de jônges oét de buurt en de vrinde van zien broor Wim, ware eigelik ouk de vrinde van Mieke. Ein van die vrinde waas Peter Jansen (dé Peter Jansen van ‘t duo det later bekind zoel waere as “Peter en Wim”). Naodet zeej zich ein bietje oét ‘t oug verloore, kwame zeej zich jaore later taege in ein café. Mieke waas inmiddels kleuterleidster en Peter meister op de liëgere schoël. Peter wis det Mieke gaer en good zông en toen Peter later op de trouwreceptie van Mieke te gas waas vroog hae Mieke um ein vastelaovesleedje te zinge.

Peter waas toen al bedréve in ‘t schriéve van leedjes en vormde same mit zien vrinde oét de ônderwiéswaereld ‘t koër  “Hald ‘t naat” . Zeej woorte 3e beej de Blierickse Wortelepin mit ‘t leedje: "Tante Mien". 1977 en 1978 deej Mieke mei in Blierick én Venlo mit leedjes geschreve door Peter en Wim, maar wis gen plaats op de plaat te bemachtige. 1979 ouk neet d’r beej maar woort ‘t waal iërste beej “Boéte de Paort” mit “De Ruige” en zông ‘t mei op de elpee’s die ônder de hoede van Nol Peeters woorte oétgegaeve beej ‘t Tref. 1980 ging Mieke same zinge mit Hans Mans en waare zeej volges Mieke ‘t iërste man/vrouw duo, die meideeje aan de leedjesaovende in Blierick en Venlo. Mit “Truuk van weggewaes” hadde zeej succes in Blierick: 1ste plaats in 1979.

Moei um te zeen det Mieke op de foto wuurt umringk door minse as Claar Boots, Petra Houben, Hay Crompvoets, Frans Driessen, Ad en Herman de Koning, Hay en Paul Peters en Ben Verdellen. Blierickse en Venlose “artiste” die de Vastelaovend aan beids kante van de brök verriekte mit eur leedjes. 1981 dan allein weer succesvol in Blierick, same  mit Hans Mans woort “Vutje veur Vutje” bekroënd mit ein 1e plaats. Sezoen 1982/1983 waas ‘t intelik in Venlo raak. Mit “Op zién Venloos” woort ‘t same mit Hans 3e. Sezoen 1983/84, Mieke waas allerwiels zwanger, woorte ze 4e in Blierick mit “Veer kleine wäördjes”.

1986 dan net gen plaats op de plaat in Venlo mit “Viéf veur twelf” van de hand van Joep Huybrechts en Guus Timmermans. Waal moch het same mit Hay Crompvoets ‘n moei leedje zinge op de Jocus LP: “Efkes vreeje”. In de 80er jaore verhoésde Mieke nao Baolder en zông dao in 1994 ‘t leedje “De verleefden tak” mit Wim Keunen nao ein finaleplaats van ‘t LVK. Vanaaf det moment begôs Mieke same mit Wim Roeffen zelf mit ‘t schriéve van leedjes wies 2006.

Veur dochter Maike en Linda Zijlmans schreef ‘t in 2002 ‘t leedje “Maedjes van de Nach” waat beej de letste 11 op Jocus leedjesaovend kwaam.

In 2007 moch Mieke same mit Hans Mans de Boétegewoëne Boétezitting äöpene mit : "Op ziën Venloos". Det waas ‘n geweldige ervaring.
De letste jaore hebbe weej Mieke kinne bewôndere beej de Venlose en Blierickse revue en vormp  ‘t same mit Resi Wolters en Evelyn Theunissen de “Hômmelschoorzuskes”.

Mieke is wies op d’n daag van vandaag actief.