Wae de jeug haet, haet de toekôms
Jocus vindt ‘t belangriék dat de jeug ouk beej de vastelaovend wuurt betrokke. Daorum is Jocus gruuëts op al die evenemente waobeej de jeug is betrokke. Dit kiër Jocus Toekôms en de Jocus Pocus
Promobus Jocus Toekôms
In 2010 haet Jocus Toekôms via de gemeinte en stichting Wel.kom einen alde SRV waage verkreege. Deze SRV waage had ein aantal jaore deens gedaon as sport en speulbus ten behoeve van ‘t jeugwerk van stichting Wel.kom. Maar doordet zeej de zaake anders ginge aanpakke woord de bus neet miër gebroek en stônd stil. René Ensink, werkzaam beej Wel.kom haet toen mit de eigenaer van de bus, de gemeinte Venlo euverlag gehad en zoë haet Jocus Toekôms de bus verkreege. In iërste instantie goof me d’r nog gén 5 cent miër veur, maar door inzet van inkele Jocus Toekôms leeje is de bus umgetouvert wies wie hae noow is.
Geliék van ‘t begin aaf, ôntstônd d’r ‘t ideej um mit dees bus aan te sloéte op de vastelaoves lespakkette die inkele jaore daoveur oétgereik ware aan basis schoële. Noow kôs me die lesse interactiever maake doordet Jocus Toekôms mit de bus nao de schoële reej en de liérlinge oét de klas haolde. Iets niejs, dus me waas beniejd of ‘t aan zoel slaon.
As iërste waas haos vanzelfspraekend de schoël van Hans Jacobs, de Hertog Reinoudschoël. Op de bewuste daag stônde inkele liërlinge de bus van Jocus Toekôms verkleid op te wachte. Flot de stroum aansloéte en de iërste liërlinge woorte verwelkômp in de Jocus Toekôms bus door Francien Pollux, Rob Brünken, Funs Jacobs en René Ensink. De liërlinge kreege informasie euver Jocus Toekôms en jeugvastelaovend, mochte zich verkleie en op de foto, hadde ein speurtoch door de bus en hadde eine fotopuzzel. Dankzij Fotokino Linders kôste de foto’s geliék aafgedrök waere. D’n tiéd waas iets te krap ingepland en zoë stônd veur det we ‘t wiste de volgende groep niesgierig te wachte.
Nao de Hertog Reinoudschoël volgde nog de St. Willibrordusschoël wao we haos 150 liërlinge ontvange hebbe in de bus.
Later det jaor is de bus nog ingezatte beej ein oétwisselingsproject van de St Martinusschoël en beej de optochhal wao Kinder van ein BSO oét Belfeld ein rôndleiding kreege.
Jocus Toekôms meint det door dees opzet ein meugelikheid is ontstaon um de jeugvastelaovend ônder de aandach te bringe beej de juuste doelgroep en zal det in de toekôms ouk bliéve doon en wao meugelik nog oétbreide. Alles ônder ‘t motto "Wae de jeug haet, haet de toekôms". ‘t Volgende project mit de promobus is ‘t op de schoële ônder de aandach bringe van de jeugbuutreedners wedstriéd veur basisschoël-liërlinge inclusief masterclasses cq workshops, mit veur de winnaer ein troffee verneump nao de vurrig jaor euverleeje en bekinde buutreedner Jan Pollux.