Waat waal of waat neet te doon – tips veur kleijage van hudje wies schoon Deil 5
Biëstig good, ‘t waord zaet ‘t eigelijk al. De kleurriéke waereld van de fauna is ein groëte inspirasiebrôn veur vuuël vastelaovespekskes!
Veural veur de jônge vastelaovesvierder zien dit pekskes die tot de verbaelding spraeke! Kleine aoliebiësjes, vlinderkes, baerkes en hundjes zien vuuëlal te vinde tiéjes de kinderoptoch op vastelaoveszôndaag. Dit is de waereld die veur dees laeftiedsgroep tot de verbaelding sprik! ‘t Zuut dan ouk knoepig oét zô’n klein hummelke in de kinderwaage mit ein baerepak aan en is lekker werm! Maar ouk de jeug, en dan veural de maedjes, zuusse mit vastelaovend dökker mit vleugelkes van ein bij of eine vlinder euver de Parade dartele! Toch zien d’r hiël vuuël volwassene die iets mit ‘t thema biës doon mit vastelaovend. Dink dan aan de Jocushaan of ein kiep, maar ouk baere, veugel, visse of paerd zien ein gewillig ônderwerp um creatief mei aan de slaag te gaon! Beej dees pakke is veural de schmink en ‘t stôf det wuurt gebroek veur ein pak bepaolend veur ‘t totaalbeeld!
Waat zien de trends op dit moment vanoét dees invloede?
Ganse pakke, inclusief kop veur euver de kiëbus, van ein biës zuusse neet zoë dök in ‘t Venlose vastelaovesbeeld. ‘t Zien veural de pakke die zelf zien saamegesteld um tot ein volledig biës oét te greuje. Tiégers, panters en lieuwe hebbe ein moeie print in de vach en ein oétgespraoke kop um in de schmink te zitte! Heejbeej is ‘t belangriék det veural dae print van de vach truuk kump in de kleiage. Eine kraag, erm,- en beinstökke en eine stert in print of bônt op ein effe bôks en (col)trui zien genôg um ‘t gehiël op ein van die kat-echtige te laote liéke! Heejbeej ein haorband mit oëre d’r op en ‘t gezich beejpassend geschmink maake ‘t gehiël aaf! Andere prints die moei te gebroéke zien in ein pak zien die van eine zebra of ein koe. Allebei zwart/wit, maar juus door de print hiël opvallend. Ouk heej weer: de hoofs d’r neet as koe of zebra oét te zeen mit de kop of puuët, as de print maar klop en good is te zeen. De kins bes eine rok aan mit koejeprint, dao ônder klompe mit geitewolle zök, ein zwart truitje aan en koeje-oëre op de kop, bel um de nek en ‘t plaetje is compleet. Asse dan ouk nog in de gelaegenheid bis um dich moei te (laote) schminke, kumpse geheid in ein gooj wei!
Veugelkes zien meistal as ônderdeil aanwezig op ein hudje of jas. In allerlei kleure en oétveuringe zien ze te kriége. ônder dees ‘gevederde vrienden’ is veural d’n haan en de kiep in ‘t Venlose ein regelmatig truukkiérend biës. Visse (dink aan d’n hiéring dae regelmaotig langskump aan eine stek of in ein tönke) zien ouk ein gewillig ônderwerp. Veugelkes en visse zien d’r in zoë vuuël kleure, det ze ouk eigelijk altiéd leuk gebroek kinne waere in stôffe van pakke of as ônderdeil van ein hudje!
Vastelaovend is veural ein fees van dich zelf zien! Doon wao desse zin in hebs! Dich good veule. En asse d’r leuk oét zuus, veulse dich ouk good. Fladder 3 daag rônd, bin gerös zoë stôm wie einen aezel, maar asse d’n haan geis verzoépe en de zuus zoë greun wie eine kikker, dink dan ens aan de kater! Proos!