Waat waal of waat neet te doon – tips veur kleijage van hudje wies schoon (deil 4)

Ein echte hype  zien op dit moment de Tiroler kostuums. Echte dirndl kledjes, lederhosen, geroete blouse, Tiroler hudjes en tasjes, bergschoon, berghutpinkes veur op de jas, ‘t geit wie einen trein! Houfkleure veur deeze stiel zien roëd, wit en greun. Dames in rok mit schölkske en witte blouse of  dirndl kledje, manne in lederhosen, dreejkwart ribbôks en roëd-wit geroéte blouse of witte blouse mit zwart jeske. Edelweisbleumkes die truuk kômme in band of op hudje.

Ouk ‘t venitiaans carnaval is ein gewillig ônderwerp en inspirasiebrôn um te gebroéke mit vastelaovend! Heejbeej zien ein paar opvallende zaake: De maskes waere euver ‘t algemein neet gebroek as maske, maar as accessoire (waal op ein stekske in de hand) op hudje of kallebas. Alle kleure zien in dees stiel te gebroéke, maar glimmende stôffe en glitter en gold huúre d’r waal beej. Dit is ein van de sjiekere stiele binne de verschillende struiminge. De nar en pierrot kômme veur in ‘t venitiaans carnaval, maar is heej neet dök te zeen. Det is jaomer, want dao kinse ein kleurriék pak veur maake! Ouk Egypte, Turkije en andere oësterse lande hebbe zoëwaal as land as vanoét de geschiedenis invloed op ôzze vastelaovend! Dink aan Cleopatra, Ramses, griekse goden of dames in Perzische gewade. Maar ouk hongaarse pakke zien ein  fees um te zeen!

De geschiedenis guuëf ôs ridders en prinsesse, hertoge en hertoginne, musketiers, soldaote oét allerlei tieje en lande: franse revolutie of vraemdelingelegioen, chinese krijgers, eigelijk te vuuël um op te neume!

Verkin de waereld en gank ens op reis! Zet de kompjoeter aan en verdeep ôg ens in de kleiage oét andere lande. Dit is ein prachtige brôn van inspirasie veur ôg volgende vastelaovespekske. Dök kômme d’r verrassende ideeje oét! Vuuël plezeer mit de veurbereidinge!

Laes de volgende kiër nog miër tips um gekleurd veur d’n daag te kômme!