Waat waal of waat neet te doon – tips veur kleijage van hudje wies schoon Deil 3
Ein trend op vastelaovesgebied dae eigelijk al hiël lang besteit is de invloed van geschiedenis, andere lande en kulture op ôs vastelaovespekskes. Heejbeej zien d’r al drek ein paar veur de hand liggende te neume: Flower-power, indiaan, cowboy, Spanje, oësterse lande zoë als China, Japan. Dae trend haet zich sinds de jaore 70 sterk ôntwikkeld. Waas ‘t toen nog alle jônges as cowboy, soldaot of indiaan en maedjes as prinses of sjieke dame, noow haet zich dae trend vuuël miër doorôntwikkeld. Ein chinees pekske mit gael hesje en stroejen hood haet plaats gemak veur geisha’s in zieje gewaad. De indiaan mit franjepak en vaer op de kop is eine Sioux indiaan gewaore mit döbbele riej vaere op de kop en kettinge mit beteikenisvolle baedels d’r aan! mit De waereld um ôs haer is door de kôms van tillevisie en internet ein stök groëter gewaore en daomei de invloede ein stök doënerbeej gekômme. Ouk materiale zoë als stôffe, pruuke en accessoires hebbe zich ôntwikkeld en die zien taegeswaordig ouk vuuël gemekkelikker te kriége of we neme ze mei as we op vakansie zien gewaes. We gaon dökker en vaerder weg op vakansie, waodoor we ouk miër zeen van die andere lande en kulture!
Waat zien de trends op dit moment vanoét dees invloede?
De jaore ’60, ’70 en ’80 zien jaore wao in ‘t moëdebeeld sterk van kleur en vorm waas. Dit zuusse dök truuk mit vastelaovend en blief ouk leuk! Discokleier in felle kleure, groëte pruuke en brille en einen blouse mit ruches. Maar ouk de flowerpower tiéd is nog altiéd hip um truuk te laote kômme in dien vastelaovespekske. Gebroék dan felle kleure en bloome. Kostuums oét de historie: Napoleon, de dreej musketiérs, kleiage oét de middelieuwe en de barokke tiéd. De Spaanse flamencodans is ein inspirasiebrôn veur veural jônk, maar ouk ald! Op ‘t vakansieadres in Spanje wuurt dök ein kledje, schoon en weier gekoch um mit de Venlose vastelaovend aan te trekke!
Laes de volgende kiër nog miër tips um gekleurd veur d’n daag te kômme!