Waat waal of waat neet te doon – tips veur kleijage van hudje wies schoon Deil 2
Gank ouk ens schuume beej eine 2e hands winkel. Cômbineer niej mit ald: de vintage-look! Ein hippe blouse mit kant of bloome duit ‘t perfek beej eine lange zwarte jas asse eine pirate look wils laote zeen! Tôffe dunne sjaal um de nek en eine nieje hood d’r beej, klaor! En oéteraard hoof neet idder jaor ein niej pekske gekoch te waere. Eine jas dae idder jaor ‘gepimp’ (laes: nieje knuipkes, aafwerke mit nieje kleur band etc) wuurt is ouk good! Ouk ein kant-en-klaor pekske kinse hiëlemaol nao diene stiél make door d’r nog waat aan toe te vooge: zet d’r ein fleurige korsaasj op of versier dien nieje jeske mit medalies!
‘t Iërs waat opvelt is diene bums! Dao kiéke minse as iërs nao! Dien gezich in de schmink, haor good gekap of ein felle pruuk, dao op ein moei hudje en waat fleurigs um de nek.
Accessoires zien de letste puntjes op de i van dien kleiage! Ein moeie pruuk, handschoon, kallebas, krallentoér maake ‘t gehiël aaf. Gank op tiéd op paad en vraog um dich haer. Dök weite minse um dich haer net det eine adres veur eine moeie jas of ein winkelke mit tôffe stôf! Maar vergaet veural neet: ‘t is vastelaovend: gebroék kleur, humor (as dich einen doorslaag op dienen bums wils zitte, môsse det veural doon!), glitter, schmink en eine lach en laot andere lache door dien verschiening. Want mit ein greekgezich steit d’r neemus leuk op!
Oéteraard zien d’r nog vuuël miër trends en struiminge op vastelaovesgebied! Dao euver de volgende oétgave miër!