Waat waal of waat neet te doon – tips veur kleiage van hudje wies schoon (deil 6)
Neet weg te dinke oét ‘t vastelaovesbeeld zien de uniforme, fanfare (jeskes) en hudjes.
Ganse nieje mit glimmende knuip en epaulette op de schouwers; hiële alde mit dônkere kopere knuip en aafgesleete plekke; roëje, blauwe of zwarte: uniform,- of fanfarejeskes! Vrouwe, manne, jôngk of ald, idderein haet waal ens ein uniformjeske aangehad, in eigendôm of geliënd.
Waat zien de trends op dit moment?
Trend is det alsmaar miër vrouwe en kinder uniforme of fanfarejeskes gaon draage. Waare dit veurhaer veural de hiëre die heej in verscheene, alsmaar miër dames gaon dit kleidingstök aan eur garderobe toevooge. Heejbeej wuurt dan waal ein vrouwelijke knipoug aan toegevoog in de vorm van ein zwierige gekleurde of hippe golde pettycoat! Dao onder einen blouse mit ruches aan de mouwe en eine kleurige sjaal um de nek. De kinder ‘t jeske lekker groët, zoëdet d’r eine werme jas ônder kin!
De jeskes kinne niej of ald kant-en-klaor mit alles d’r op en d’r aan gekoch waere. De meist veurkômmende kleure zien dônkerbauw, zwart en roëd. Smeis gekômbineerd mit wit, gold of gael. Korte jeskes wies op de vot, maar ouk jasse mit lange slippe aan d’n achterkant. In huzarestiel mit döbbele riej knuip of eenvoudig fanafare mit ein inkele riej knuip. Toch wille de meiste minse de jeskes zelf einen eigen drei gaeve! Dit gebeurt dan in de vorm van speldjes, medalies, euverdreeve groëte epaulette in aafstaekende kleur (kant en klaor te kriége beej fourniturezaake, maar ouk good zelf te maake!), eine opstriékhaan op d’n achterkant, nestel/fluitkaord in hippe kleure.
Ein jeske in deeze stiél kinse ouk gans zelf maake! Ein donkerblauw of zwart jeske van ein gewoën pak is nogal vlót en mekkelijk aan te kômme. Heej op mit gold of zilver galon band (beej de baetere fourniturezaake te kriége) de biéze aanbringe, dito knuip op aanbringe en de bis al ein hiël ind op waeg! Um ‘t aaf te maake epaulette op de schouwers zitte en de revaers mit medalies volhange!
Fröbel ze, wies de volgende kiër!