Waat waal of waat neet te doon – tips veur kleiage van hudje wies schoon 7

 Ein trend dae geliék op geit beej zoëwaal manne as vrouwe is det beej dit saort  jeskes alsmaar dökker ein hudje wuurt gedraage det neet beej de stiél van ‘t jeske huúrt. Hudjes waere zoëwiezoë alsmaar groëter en opvallender in ‘t vastelaoves straotbeeld. Van faom kinne de meist prachtige vorme gemak waere en zien neet zwaor; mit of zônder lempkes; alde lampekappe of einen doorslaag kinne umgetouverd waere tot de prachtigste hudjes; waat sjieker: van vilt mit bloome, vaere en glitters, zelf gemak of gekoch; hudjes passend beej de outfit dae me aanhaet: pliesiepet, brandwaerhelm of Thaïs hudje mit glitter kleur en kralle, veulal meigenaome van ein reis!

‘t Kin eigelik neet gek genôg! Eine opkômmende trend ônder de hudjes zien hiële kleine sjieke hudjes. Meistal zitte die op einen haorband of ein schuufpinke. En waat is d’r leuker um mit de kinder aan de taofel te zitte um ein eige hudje inein te knutsele? Mit ein ald hudje, liémpistool, waat bloome, stufkes, knuip en lintjes hesse al vlot ein hippe kreasie!

Zoë zien d’r nog zoëvuuël vastelaovespekskes ideeje, de meis opvallende heb ik de revue laote passere. Ik haop det ‘t ôg inspirasie haet gegaeve veur de kômmende vastelaovend!

En dan is ‘t noow haos zoë wiéd: Vastelaovend. Heb geej ôg pekske al klaor? Hink alles al te luchte um fris aan te kinne trekke? Of ziét ge nog duugtig in de waer mit naold en gaare um de letste hand te ligge aan ‘t pak veur d’n optoch?  Ein dingk is zeker: De stad zal weer oét zien vooge barste van de kleure en kreasies! En zoë huúrt ‘t!

Oh jao, en as geej mit ein liémpistool aan de slaag wilt gaon: pas op! De liém is heit!!!