Waagebouwers kinne terech in hal kazerneterrein

Vanaaf ‘t volgende vastelaovesseizoen kinne de vereiniginge oét groët Venlo mit wages en dekorbouwers terech in ‘n groëte optochhal op ‘t Frederik Hendrik Kazerneterrein in Bliërick. ‘n Nieje stichting wao-in Jocus, De Wortelepin, Den Oeles en De Belhamels vertaegenwoordig zien, Stichting Optochhal Groët Venlo, geit de hal behere.  De veurmalige garageloëds op ‘t kazerneterrein is beschikbaar veur alle wages en dekorbouwers veur de verschillende optochte en zaalaktiviteiten in hiel Venlo. Neet allein de vastelaovesvereniginge kinne d’r terech, auk carnavalsgroepe die deilneme aan ‘n optoch meuge gebroék make van de ruumte. De stichting druuëg zörg veur ‘n good beheer.

‘t Bliek veur de vastelaovensvereniginge steeds lastiger um geschikde lokasies te vinde um aan de wages veur d’n optoch te kinne bouwe. Idder jaor ware d’r waal ad hoc oplossinge, maar ideaal waas de situatie neet. Verantwoordelijk wethalder Twan Beurskens is same mit de vereiniginge op zeuk gegaon nao ‘n oplossing veur de langere termien.

“Ik bin erg bliej mit dees positieve oétkoms”, alzoë wethalder Beurskens. “De waage- en dekorbouwers zien verlos van de jäörlikse onzekerheid. De samewerking tösse de gemeinte en de vastelaovesvereniginge onderling is versterk. ‘n Fantastisch evenement, det de vastelaovend in Groët Venlo is, wuurt d’r mit fantastische wages veur alle vreejwilligers en ‘t publiek allein maar baeter van”.

‘t Geit um ‘n groëte garageloëds aan de ziekant van ‘t Kazerneterrein. ’t Haet ‘nnen eige toegang vanaaf de Horsterwaeg en is door middel van ‘n hekwerk aafgescheije van de res van ‘t terrein. In principe huurt Stichting Optochhal Groët Venlo de garageloëds veur ‘n periode van viéf jaor van de gemeinte. ‘t Gebroék van de loëds hoof de vaerdere ontwikkelinge van ‘t Kazerneterrein auk in de toekoms neet in de waeg te staon.