Vuul zang, cabaret en dans op Pronkzitting

De kômmende Prônkzitting, op 12 november in de Maaspoort in Venlo, zal in ‘t teike staon van vuul zang, cabaret en dans.

Volges Ton Lamberts, veurzitter van de Joekskemissie, is Jocus d’r weer in geslaag um ‘n good en gevarieerd programma op ‘t podium te bringe. D’r zien nog inkele kaarte. Dees zien te kaup beej Sporthoés Olympia, Groëte Baekstraot 1 in Venlo en kôste €20.

Dit jaor zal ‘t publiek kinne geneete van vuul lvastelaovescabaret. ‘t Duo Stenzel en Kivits zörg veur ‘n unieke kombinasie tösse klassieke meziek, humor, theater, muzikale hoëgstandjes en improvisasie. Ruud Stikkelbroeck stelt vanoét zien “bôks” weer allerlei zake op humoristische wiés aan de kaak. Har Daniëls steit al 15 jaor in de buut. In 2008 woort hae Nederlands kampioen. Auk Pierre van Helden zal de zaal laote böldere van ‘t lache. Hae woort dit jaar veur de viéfde kiër Groët Limburgs kampioen. 

Vanwaege ‘t biezondere jaor 2011, traeje alle artieste nog ens op die de aafgelaupe elf jaor as iërste zien geëindigd op de Leedjesaovend van Jocus. Netuurlijk ontbraeke de veer kersverse Venlose vastelaovesschlagers neet. Tenslotte zal ‘t bekinde trio Weej Dreej de zaal laote geneete van eur vuule suksesnummers.

Auk veur dans en acrobatiek is gezörg. ‘t Publiek zal zich verbaze euver de döks halsbraekende en acrobatische danse van de Tanzgarde Krefeld en de Kammerkätchen und Kammerdiener. Dees traditionele dansgroep oét Kölle, in eur moëie roëd-witte kôstuum, is ‘t oéthangbord van ‘t Kölse vastelaovesgezelschap Schn??sse Tring det al sinds 1901 besteit.

De Jocus Prônkzitting wuurt ‘t letste optraeje van Prins Ruud I mit zien adjudante Toine en Gerrit. Zeej zulle afscheid neme en op waeg gaon nao de Prinsehemel.