Vrouw vind Mikwe in de kelder

Rektifikasie
van de redaksie

Deze kop stond baove ein artikel in de vurrige oétgave. Spiétig genôg had de verslaaggaever weer ens neet opgelet. As persmuskiet kwaam hae net van ein resepsie aaf wao hae veur lau kos kleppe.

Os ekskuses. Heej volg de waore toedrach.

In bewus artikel kump Mevr. De Herk oét de Heiige Geisstraot aan ‘t waord.
Zeej had, gans van slaag aaf, beej de bure aangebeld. De buurvrouw deej aop en Mevr. De Herk bazelde ein ôngeluifelik verhaol euver eure kelder. Nao inkele tasse kôffie mit (venlose) likeur en stök vlaai en ein of twië flesse wien oét de Wien, waas de paniek gezak.

Ondertösse had de buurvrouw ôs opgebeld, um ‘t ganse verhaol te vertelle aan einen echte verslaaggaever. Dae waas dus ônderwaeg vanoét die resepsie.

Nao inkele tasse kôffie mit (venlose) likeur gén vlaai, ein aspirientje en maar ein fles wien, haet de verslaaggaever ‘t verhaol nao ôs gesteurd en hebbe weej ‘t geplaats. Mevrouw De Herk had namelik ein mikwe in de eure kelder gevonde. Neet niks, vond ouk de stadspuinopgraver, dae aevel neet mit naam geneump woel waere, net wie de wethalder.
Nog ein mikwe en Venlo zoel beste mikwestad van 2013/14 zien ! Maar helaas.

Waat bliek now?

Mevr. De Herk had baodschappe gedaon en had die keurig opgeborge. In de keuke en in de kelder.
Truuk in de keuke waas zeej eur gebit kwiét. In paniek is ze toen nao de bure gerend en haet alles verteld. De buurvrouw, Mevr.Körk, ouk oét de Heilige Geisstraot, is aevel ein bietje douf. Ozze verslaaggaever waas ein bietje blauw en zoë kwaam dit verhaol in umloup. Nogmaols ôs ekskuses.

Mevr. De Herk vônd ‘t gebit weer truuk en loos toen ‘t artikel in deze krant. Ze haet metein de redaksie gebeld. D’r waas gén mikwe in de kelder, nae ze had de mik weer gevônde in de kelder. Dae waas kwiét wie zeej de baodschappe had opgeruump.

Naogekômme berich:
“t Limburg Museum luuet weite génne nieje zaal te bouwe.
De Redaksie