‘t Publiek in de Maaspoort wuurt verwind mit ein spectaculair program.  Let op: ‘t program in de zaal start al um 19.15 oor, det is 30 minute iërder as op de kaarte vermeld steit. Naeve de 11 finaliste kint geej geneete van optraejes van "Manne Meine" – winnaer 2013, DaMaZoeë, Thei en Marij, W-Dreej en Jocus’ Hofkepèl.

De prissentatie van de Leedjesaovend is in hand van Lex Uiting en Funs Pollux. Lex zal de prissentasie vanaaf de buun verzörge en Funs zal onderwiél d’n aovend vordert interviews en reacties haole beej artieste en bezeukers in de zaal.

In eine spectaculair aangekleide zaal zien taeves genôg krökke aanwezig. De kômmende daag zette de 11 finaliste same mit Jocus Hofkepel de kômmende daag de punte op de "i" veur eine joeksige Leedjesaovend.

Bekiék via Omroep Venlo nog vlot de veurstökskes van de leedjes en zing all 11 de leedjes mei! En ôngetwiéfeld…aan ‘t ind van d’n aovend löp de spanning tiedes ‘t bekindmake van d’n oétslaag op…. Waat zien de winnende veer leedjes? Wae geit nao hoés mit de grutste iër en “de Funs”?

Kaarte zien te kaup beej Theater de Maaspoort, Sporthuis Olympia Jan Klein, Slegterie Schreinemachters en Plus Benders Venlo. Opus Jocus 2014 vindt plaats op zaoterdaag 4 oktoëber in Theater de Maaspoort in Venlo en is live te zeen op Omroep Venlo tillevisie.

Volg de kômmende daag de berichgaeving op www.jocus.nl en de sociale media kanale veur ‘t letste niejs!
 

---

 

Miër informasie euver de artieste:

Da Ma Zoeë
Da Ma Zoeë kump oorspronkelik oét Hors, oeits begôs beej CV D’n Dreumel tiedes ein optraeje mit de Mühltaler. Vanaaf det optraeje hebbe ze hard gewerk aan ein groët Schlager rippertoir aangevöld mit Duitstalige feesmeziék. As ‘t zoeë neet geit …Da Ma Zoeë!

Thei en Marij
Thei en Marij, wae kint ze neet? Begós op onder andere Jocus buun, miër as 11 kiër noome ze deil aan ‘t LVK met ein euverwinning in 1993, haos ein ôntelbaar aantal noteringe in de diverse hit-liéste in Limburg, zes CD’s en honderde zoëneet doézende optraejes door de jaore haer.

Talloze kiére ónderscheidinge en priéze hebbe ze terech meuge óntvange, inclusief De Gouden Narrenkap. Petje aaf en de buun vreej veur Thei en Marij!

W-Dreej
Sinds 2002 raos W-Dreej door ôs provincie.  ‘t Startschot woord op Jocus buun gegaeve met ‘t leedje Höf de Glazer. Vanaaf ‘t begin goeijt W-Dreej hoëge auge. Neteurlik neet allein op Jocus buun, maar mit dank aan eur LVK euverwinninge reike zeej wies de ganse provincie Limburg en wied daoboéte.

In 2010 behaolde zeej de 1e plaats op ‘t LVK met “Vandaag”. Det kunsje herhaolde zeej in de 2 opvolgende jaore nog ens!

Zeej behuure tot d’n absolute top in eur genre, dao werke ze keihard veur én succes is naovenand. Weej gunne eur det succes van herte! Leech oét, spot aan en doot ens gek!