Voetbalclub FCV organisator van de Boérebroélof van 2009/2010

Tiedes de maondelikse raodsvergadering van Jocus haet ‘t bestuur unaniem gekaoze veur voetbalclub FCV as organisator van de Venlose Boérebroélof 2009/2010.  Football Club Venlo oét ‘t buurtschap ’t Ven is ‘n voetbalvereiniging van ongeviër 450 leeje, waovan miër as de helf jeug. Dit jaor besteit de club 77 jaor. In 1982 môch de club in ‘t kader van ‘t 50-jäörig jubileum al ens de Boerenbroélof organisere.

‘t 7 x 11 jäörig jubileum en veural ‘t groëte aantal jeugleeje haet ’t bestuur van Jocus doon besloéte um ’t Ven de iër te gunne om dit groëtse Venlose fees te meuge organisere.

Jocuswoordvoerder Roel Vesleijen is d’r van overtuug det FCV d’r veur zal zörge det Venlo in 2010 in naovolging van de Meulewiekers wederum ‘nne prachtige Boérebroélof zal kriege.