Veurspelling van Venlose Kunztelaer

Vors Joeccius XI waas d’r gruuëts op det neemus ‘t prinsschap van Lucas I van Jocus haet veurspeld, maar gisteraovend bleek det toch neet gans te kloppe.  In ‘n beslaote gezelschap in Hotel Wilhelmina woort Prins Lucas I ‘n prachtig schilderie aangebaoje door Piet Kuntzelaers dae inkele maonde geleeje besloot ‘n acrylschilderie te make van ein van de orkesleeje van joekskepèl Neet Um Aan Te Huure (NUATH). Dit carnavaleske schilderswerk had veurspellende waerd. De kunstenaer vond ‘t baeld van de muzikant zoë typisch Venloos, zoë typisch vastelaovend, det hae besloot d’r ‘n schilderie van te make. Hae kôs op det moment mit gen meugelikheid weite det hae de toekomstige stadsprins van Venlo aan ‘t schilderslinne ging toevertrouwe. Naodet Lucas Peeters zich as Prins Lucas I op ‘t Jocus Hofbal had geprissenteerd wis hae det dit kleurrieke schilderswerk slechs einen eigenaer môch kriege en det is uiteraard Venloos einige echte stadsprins. Prins Lucas I tuinde zich biezônder vergöld mit ‘t kunswerk en goof aan det dit ‘n biezôndere plaats in zien prinselikke woënkamer zal kriege.