Veurselectie 2017: miër inschriévinge en nieje deilnemers

Leefs 25 leedjes zien ingeschreve veur de Veurselectie van Jocus. Det zien 4 leedjes miër as ‘t veurig jaor. Opvallend is ein aantal nieje schriévers en kômponiste die meidoon.

De Veurselectie in de Venlonazaal is beslaote veur de deilnemers en vindt plaats op zaoterdaag 26 augustus. Onder de deilnemende leedjes zitte inkele aeve leuke as verrassende combinaties van zengers en zangeresse. Leuk is auk ein aantal deilnemers vanoét de Herfshane asauk oét de Venlose Revue die meidoon. D’r is vuuël variatie in de deilnemende leedjes; van klassieke- en niejerwetse vastelaovesleedjes en van wals wies rèp.

Tiédes de Veurselectie waere door de vakzjurie de finaliste gekaoze veur Opus Jocus Leedjesaovend.

De Leedjesaovend wuurt gehalde op zaoterdaag 30 september in Theater de Maaspoort. De kaartverkaup begint aan ’t ind van de zomervekantie op zondaag 27 augustus.

Volg de social mediakenale van Jocus veur ’t letste niejs, of kiék op www.jocus.nl.