Veur ’t slaope gaon: snuutje wasse! – tips van Josje

D’n bal is euver, ‘t fees is gedaon  en ‘t bedje rup.  Maar iërs môt dae schmienk nog van ‘t gezich. Waat is daoveur de beste meneer?!

De begins mit ein washendje naat te make en vervolges weer flink oét te kniépe. Dan pakse vloeibare zeip of baby-sjampoo en dae duisse op dien washendje. En dao geisse dien ganse mörfke ens lekker mei inzeipe. Niks nog water d’rbeej, allein dae vloeibare zeip. En as alles lekker doorein is gepoets en de oorspronkelikke kleure zien neet miër herkinbaar, dàn pas speulse dien washendje good oét en geisse mit riékelik water d’raan. Gebroék kald water; van werm water gaon dich de porieje aop staon en dan hebse kans desse dao de schmienk in wriefs. Good speule, vuuel water en as zo’n bietje alles van ‘t gezich is, dan kinse dich aaf druuëge.

Dan bliek meistal, det t’r nog zo’n donker rendje ônder de auge zit. Pak daoveur eine wattip, maak dae naat mit ein bietje van diene eige speej (dae van eemus anders meug netuurlik auk, maar det is toch anders….) en gank daomei euver det donkere rendje. Daomei haolse de letste schmienk auk nog e-weg. Eventueel nog ein voedende crème veur de huid en dan geisse lekker slaope. Want morge meugse wéér op paad en mot dien gezich good oétgerös zien veur weer ein nieje laog schmienk!