Veur de 55e kiër Vastelaovend in Maria Auxiliatrix
We schriéve ‘t ind van de jaore vieftig as de nog jonge Cees Rinket is opgenaome in ‘t sanatorium van Maria Auxiliatrix. Beej um is tuberculose gekônstateerd. Um waat taege de vervaeling van de patiënte te doon besluut vader Henny ein inzamlingsactie te halde. Eine gas tillevisies waere geïnstalleerd in de verschillende ziekezale.
Mit hölp van de Keuninklikke Fanfare Venlo wuurt ‘t initiatief ein groet succes.In de Vastelaovestiéd geit Henny Rinket as Vors verkleid de zale aaf mit muzikante, buutreedeners en eine Hoëgheid. Ein traditie is gebaore.
In de loup der jaore kinde de vastelaoveszittinge op Maria Auxiliatrix verschillende prissentatore, zoëas Piet Pollux en Max Rinket. Taegeswaordigs praot Herman de Koning, kastelein van Kefee ‘De Gaaspiep, d’n aovend aan ein. Ein waore happening veur bewoëners, perseniël, vreejwilligers èn artiste.
De iérste jaore zien kleinschaolig mit optraejes De Straotzengers, Jocus Hofkepèl en Funs van Grinsven. In 1992 wuurt ‘t 3×11 jäörig jubileum gevierd in De Maaspoort. ‘t Is ein gigantische operatie um nao bewoëners in bedde en rolsteul nao de Maaspoort te vervoere.
De zittinge anno noow vinde plaats is ‘t sfeervolle Grand Café ‘Onder de Linden’ van verpleeghoés D’n Horstgraaf. Op de iérste dinsdaag nao ‘t Hofbal mak ouk de nieje Jocusprins mit zien gevolg zien opwachting. Zeej zien eder jaor vaste gas, netas ‘t Boerebroélofsgezelschap. Vuël artiste beklumme de buun en traeje belangeloos op. Inkele artiste van ‘t iérste oor zien Wiel Vestjens en Hay en Marian van den Ham.
Frank Rijnders, ald bestuurslid van De Zorggroep en in 1999 adjudant beej Jocus vertelde in ein iërder interview: “’t Is waanzinnig belangriék. Normaal vindt de Vastelaovend in de stad plaats. Weej bringe Vastelaovend nao de minse toe. ‘Vastelaovend d’n berg op’. Voor ‘t Dreejspan van Jocus is ‘t éí van de moeiste optraejes. Dich wuurs gekônfronteerd mit de zwaduwzieje van ‘t laeve. De bewoëners belaeve ondanks alle elend eine fantastische aovend. ‘t Duit deug um det mei te make. De organisatie en alle vreejwilligers kinne nneet genôg gepraeze waere. Nae, dees traditie is altiéd ein geweldige happening, die neet miër velt weg te dinke oét ‘t sociale gebeure van ‘t verpleeghoés. Bewoëners en perseniél kiéke d’r steeds weer nao oét…"
Neet iddere bewoëner kin liéfelik aanwezig zien. Daorum verzörg Track 88 opnames die live waere oétgezonde op ‘t geslaote tillevisiecircuit. D’n aovend wuurt groëtendeils opgebrach door externe financiers die door t organiserend comité benaderd waere.
De zitting is oétsloétend toegangkelik veur de bewoëners zelf en genuëjdigde. De 5x 11 jubileumzitting steit gepland op dinsdaag 18 fibberwari, dit zal zeker ein groët succes waere, want aan de veurbereidinge van ‘t organiserend comité zal ‘t zeker neet ligge. Namens de bewoëners van ‘t Auxilitrixpark geit een groët waord van dank oét nao alle comitéleeje, artisten en vreejwilligers die mei werke aan deze aovend.
En wat ôs betref: op nao ‘t 6 x11 jäörig jubileum!
Françoise van Nieuwenhuizen