Verzamel CD-box mit LP-hits van 1977-1987

Jocus en Studio’s Theelen hebbe iërder dees waek euvereinstumming bereik euver de produksie van ‘n verzamel CD van Jocus-leedjes. ‘t Betref ‘n döbbel CD mit originele tracks oét de LP-periode 1977-1987, elf LP’s, van Studio’s Theelen. De prissentasie van dees CD-box zal zien op zaoterdaag 18 september tiedes de ‘Nach van ’t Limburgs leed’ en vanaaf det moment auk te kaup veur ‘t groëte publiek. ”n Baeter moment aan de veuraovend van ‘t joeksige jaor 2011 kôs neet waere gevonde’, alzoë de veurzitter Harry Pouwels. ‘Dao kump beej det dit najaor ‘t 44 (4 x 11) jaor geleeje is det Jan Theelen de iërste offisjele opdrach kreeg van Jocus’.

Jocus haet beslaote ’t Venlose publiek dees CD mei same te laote stelle. Idderein kin zien persuuënlikke top-3 same stellen via ‘t thoésblaad van Jocus. Dees pagina is vanaaf donderdaag 8 juli wies 25 juli online. De meis gekaoze nummers zulle op de CD waere geplaats.

Mit dit initiatief guf Jocus ‘t biezondere jaor 2011 de iërste extra franje die beej ‘n dergelijk jaor passe.