Verslaag van Elf van Elf
Mit ein daverend schot äöpende Beschermhiër van Jocus en Börgervader van de stad Venlo klokslaag 11:11oor de reeks van 11 schote waomei ‘t vastelaovesseizoen 2013-2014 woord ingeschaote.
ônderwiel ‘t iés van de rame woord gekrats ware de Jocus-leeje al ônderwaeg nao In d’n Dorstigen Haan um eine goojen baom te ligge.
Kerboét, eier mit spek, kôffie, alle ingrediënte ware ruum veurradig um eine gooje start te make. ‘t Gezelschap bestaonde oét Hoëgheid Prins Sef IV mit zien Adjudante Roel en Marc, Vors Joeccius XI, ziene wieze Raod van Elf, Sirremoniemeister, Chef de Protocol, Dansgarde, Inspiciënte, Prinsekepel én de Prinse Garde trok nao d’n Alde Mert. Heej vônd de euverdrach van ‘t Commandantschap plaats. Garde Commandant woord, alveures zien regalia aaf te ligge, gepreze door Vors Joeccius XI veur de veurtreffelikke wiés wao-op Jaap invölling had gegaeve aan dees ziér biezôndere functie.
De nieje Garde Commandant, Funs Slaats traoj nao veure. Funs woord door de Vors geïnstalleerd en beneump tot nieje Garde Commandant. Oéteraard veurzeen van gooje raod! Aansloétend inspecteerde Stadsprins Sef IV de Prinse Garde én Prinsekepel. Oéteraard waas d’r ouk noow niks aan te merke op dees twië veurbaeldige gezelschappe. Vors Joeccius XI spoojde zich vervolges nao ‘t Stadhoés wao hae, same mit de Vorste van de stadsdeile d’n Opstaeker 2014 moch prissentere.
Vervolges voltrok zich, ônder ein schitterend zunke, ein prachtig schouwspel op de Mert veur ‘t Stadhoés. Same mit Jocus trok, in eine groëte stoet gevormp door alle wiék Vastelaoves vereiniginge en ‘t gaonde en kômmende Boerebroélofsgezelschap de Mert. Mit ein daverend schot äöpende Beschermhiër van Jocus en Börgervader van de stad Venlo klokslaag 11:11 oor de reeks van 11 schote waomei ‘t vastelaovesseizoen 2013-2014 woord ingeschaote.
Daonao ging ein groët meziékspektakel van start, oéteraard georganiseerd en geprissenteerd door ôs eige Joeks Kemissie. De spits woord aafgebete door Jocus Hofkepel, waonao groëte en kleine artieste ‘t podium völde en de Mert van meziék veurzoog. HerfsHane, JVLK winnaers, de 4 winnende leedjes, Van Gelder, W-Dreej, 2×2 (um d’r maar ein paar te neume) mit as daverende aafsloéter Minsekinder!
Eine ziér geslaagde 11 van 11 mit ein bômvolle Mert ônder ein straolende zôn. ‘t Moeiste scenario waat maar dinkbaar is.
De kop is d’r aaf, op nao de Prônkzitting!
TIP: Kiék veur foto’s op ‘t Thoésblaad en op ôzze Facebook-pagina.