Vastelaovestoppers is weer truuk!

Op 11 fibberwarie 2012 um 11.11 oor is’t wir zoë wiëd. ‘t Groët-Venloos Vastelaovesevenement Vastelaovestoppers haet dan zien 3e edisie.

Umdet ‘t middels alweer dreej jaor geleeje is det dees letste edisie haet plaats gevônde hebbe alle Stadsdeilvereiniginge gemeind dit weer op te pakke en weer niej laeve in te blaoze. Zoë hebbe V.g D’n Oeles, V.V.G Jocus, V.g de Wortelpin, VV De Belhamels en noow auk as 5e vereiniging De Keieschiéters heejveur weer greun leech gegaeve.

De organisasie is in gooije hand van dees 5 gezelschappe wao ‘n aparte kemmissie bestaonde oét leeje van veurneumde gezelschappe verantwoordelik veur is. ‘t Belaof weer ‘n groët spektakel te waere.

Dees óetveuring zal dezelfde opzet halde as iërdere edisies, namelik de 2 beste jeugleedjes van iddere deilgemeinte zulle strieje um de haufpriés en det is onder andere ‘n optraeje op de Boétegewoëne boétezitting 2012 in hertje stad Venlo.

Dao naevebeej zal de winnaer van dees Vastelaovestoppers de derde Giel Aerts trofee, ‘n door Sjer Jacobs vervaardigd bronsbaeldje op sokkel, oétgereik kriege van ‘t kommitee Giel Aerts trofee. Giel waas komponis, teksdichter, muzikant en arrangeur van tig Venlose vastelaovesleedjes. Deze trofee meug de winnaer halde en is genne wisseltrofee.

De kemmissie Vastelaovestoppers wil de kômmende jaore ‘t konsep wiejer gaon oétbreide en ‘n podium beeje aan jeugdige vastelaovestalente wies 14 jaor in al zien vorme, zoë-as buut- zang- of dans. Deze jeugdige verdeene de kans um Groët Venlo te laote geneete van eur biezôndere talente.

Op 11 fibberwarie is gans Groët Venlo oétgenuëdigd um gas te zien in Belvend beej VV De Belhamels in de feeszaal van Egidius Janssen aan de Riékswaeg in Belvend. Idderein is dao van herte welkom.