Van Bommel van Dam en Jocus Museum prissentere vastelaoveskuns

Van 6 januari tot en mit 8 februari 2018 tuine Museum van Bommel van Dam en ‘t Jocus Museum kunstwerke euver de vastelaovend. Basis van de expositie vorme de ‘Vastelaovend in Limburg’ posters die idder jaor door de Provincie Limburg en Dagblaad de Limburger waere verspreid. Museum van Bommel van Dam haet de originele werke van kunstenaers wie Toën Hermans en Jack Poels nao Venlo gehaold. De prissentatie wuurt aangevöld mit werke van Léon Peters dae idder jaor ein illustratie mak veur de Jocusposter. De tentoënstelling ‘Vastelaovend in Limburg’ vindt plaats in ein tiédelikke expositieruumte aan de Niejstraot 40-42 in Venlo, taegeneuver ‘t Jocus Museum. De äöpening wuurt verzörg door Gedeputeerde Ger Koopmans en Roel Versleijen, Vors Joeccius XI van Venloosch Vastelaoves Gezelschap Jocus.

VASTELAOVEND IN LIMBURG: KUNSPOSTER
Provincie Limburg en de Sjeng Kraft Kompeneij hebbe in 2006 ‘t initiatief genaome veur eine kunsposter dae ingezatte wuurt veur de promotie van ‘Vastelaovend in Limburg’. Idder jaor wuurt eine Limburgse kunstenaer aangezôch um in ein kunswerk de gedachte van de Limburgse vastelaovend vas te legge. De provincie traejt heejmie in de vootspaore van saortgeliéke fenomene in Kölle, Venetië en New Orleans, waar dees traditie intösse tiëntalle jaore laef. De kunsposter wuurt gratis verstrek via ônder andere Daagblad De Limburger; in de ganse provincie hingk de poster in hoéskamers en kefee’s.

In d’n tössetiéd zien 12 kunswerke van kunstenaers wie Tanja Ritterbex, Jack Vreeke, Toën Hermans, Sidi El Karchi en Sjer Jacobs. Van ein aantal kunstenaers haet Museum van Bommel van Dam werke in de collectie.

VASTELAOVEND IN VENLO
Venlo haet ein riéke vastelaovestraditie. Jocus, de stadsvereiniging, is de aldste nog bestaonde vastelaovesvereiniging van Nederland, maar iddere wiék haet ein of miërdere vereiniginge. De vastelaovend wuurt in alle geledinge van de samelaeving gevierd en is ech ein volksfees. Vastelaovend mak aanspraok op creativiteit en kunszinnigheid: ‘t make van pekskes, ‘t schminke van de snuutjes, ‘t bouwe van wagens en dan is d’r nog de meziék. In ‘t Jocus Museum, det in 2017 is geopend, wuurt de geschiedenis en traditie van de Venlose vastelaovend op ein prachtige wiés getuind.

SAMEWERKING
Ondanks det vuuel kunstenaers vastelaovend viere, kômme de kuns van dit moment en vastelaovend maar aaf en toe same. Museum van Bommel van Dam – det momenteel werk aan verzelfstandiging en verhoézing – haet daorum ‘t initiatief genaome um same mit Jocus en eur vurrig jaor geäöpende museum ein samewerking te zeuke. “De kunswerke van de Provincie Limburg en de werke van Léon Peters vorme samen ein schoën en gemekkelik toegankelikke prissentatie veur zoewal kuns- as vastelaovendleefhebbers. ’t Duit ôs groët plezeer det we ôs op dees wiés kinne laote zeen.”, zoe zag Bernard Ellenbroek van Museum van Bommel van Dam.