Vastelaoveskônsert Jocus 16×11 van Sint Martinuskerk en Showorkes Hermenie Fortissimo

Beej gelaegenheid van ‘t 16×11 jäörig jubileum van Venloosch Vastelaoves Gezelschap Jocus speult stadsbeiaardier Marcel Siebers kômmende zaoterdaag 23 fibberwari mit ein ensemble van Showorkes Hermenie Fortissimo. Op ‘t program staon elf klassieke vastelaovesleedjes.

De jonge getalenteerde koperblaozers speule op viéf-enfiertig maeter huuëgte in de Sint Martinustore, vlakbeej de klokke van ‘t karillon. Zoë dwarrele de bekinde vastelaovesmelodieje wie kônfetti oét euver de binnestad um alzoë de Venlonaere in de stumming te bringe. Stadsprins Erik d’n Iërste en zien Adjudante Paul en Dominique zulle ‘t kôncert in d’n tore beejwoëne.

Dit unieke vastelaoveskôncert begint um twelf oor ‘s middaags en is ‘t allerbes te beluustere in ‘t Rosarium.
Idderein is van herte welkom!