Vastelaoves Styling
Dae gooje alde kleier-kas, kump idder jaor van pas. Maar laote we iërlik zien, dae puult idder jaor wiejer oét van de ploete die weej neet weg kinne doon."Styling" is absoluut gen Venloos waord, maar waal ziër toepasselik in deze. Weej hebbe eine Venlose expert, Saskia Theunissen, bereid gevônde um ôg waat styling tips aan de hand te doon. Doot d’r óg veurdeil mei, weej zien beniejd of weej waat "trendvolgers" gaon ôntdekke op de volgende Môtteballebal.
Waat waal of waat neet te doon – tips veur kleiage van hudje wies schoon. Dae gooje alde kleierkas… dao begint dök de zeuktoch nao ein vastelaovespekske. Waat heb ik nog ligge? Kin ‘t nog waal? Of toch maar op zeuk nao iets niejs? D’r zien op dit moment diverse ‘trends’ in de waereld van de vastelaoveskleier! Ein flink opkômmende trend is de ‘duustere’ kant van de vastelaovend mit ein flinke knipoug! Hekse en touvenaers, vampiere, bosnimfe, gothic-look, harajuku (Japanse struiming-hiélemaol hip!), pirate, ellefkes en feeje. Dees struiming wilt neet zegge det ‘t dan ouk allemaol duuster en zwart oét zuut. Juus neet! Hekse mit gewaogde schmink, glitter en felle pettycoat of ein 17e ieuwse gothic mit reiperok in pastelkleure, fantasiefiguure mit allerlei stiéle doorein. In dit rieke huúre ouk de markieze en markiezinne thoés; zeej zitte allein neet aan dae ‘duustere kant’ ‘t Kin dus allemaol! Ein andere belangriéke trend is de invloed van films en sterre! Zoë is de fantasie en de kostuums oét de films ‘Harry Potter’ of ‘Alice in Wonderland’ prachtig te gebroéke in ein vastelaovespekske: de ‘Mad hatter’ is dao ein prachtig veurbeeld van. Of dink aan kapitein Haak! Maar ouk Lady Gaga mit eur kékke pekskes, Katy Perry in diverse outfits in eur videoclips of Johnny Depp as piraat oét ‘Pirates of the Caribbean’ kinne ein bron van inspirasie zien. Dees veurbeelde zien zoëwaal veur manne as veur vrouwe. ‘t Leukste is asse as stel of gezin allemaol in dezelfde stiél op paad geis! Succes gegarandeerd!
In dit vastelaovesmoëdebeeld zien ein paar dinger wao desse op môs lette:
Belangriék is det ‘t ein gehiël is. Kleure deene opein aafgestump te waere. Laot zeen desse d’r meujte veur haes gedaon. Als d’r iets paars op d’n hood zit, laot det dan ouk in jas en schmink truuk kômme! Maak d’r ein passend plaetje van. Waat dich kin helpe beej de diverse keuzes is um de houfkleur van b.v. de stôf (in stökske in dien portemenee) beej dich te hebbe asse op inkoup geis! Zitse altiéd good mit dien kleur!
Gank ouk ens schuume beej ein 2e hands winkel. Combineer niej mit ald: de vintage-look! Ein hippe blouse mit kant of bloome duit ‘t perfek beej eine lange zwarte jas asse eine pirate look wils laote zeen! Tôffe dunne sjaal um de nek en eine nieje hood d’r beej, klaor!En oeteraard hoof neet idder jaor ein niej pekske gekoch te waere. Eine jas dae idder jaor ‘gepimp’ (laes: nieje knuipkes, aafwerke mit nieje kleur band etc) wuurt is ouk good! Ouk ein kant-en-klaor pekske kinse hiélemaol nao diene stiel maak door d’r nog waat aan toe te vooge: zit d’r ein ?eurige korsaasj op of versier dien nieje jeske mit medalies!
‘t Iërste waat opvelt is diene bums! Dao kiéke minse as iërs nao! Dien gezich in de schmink, haor good gekap of ein felle pruuk, dao op ein moei hudje en waat ?eurigs um de nek.
Accessoires zien de letste puntjes op de i van dien kleiage! Ein moeie pruuk, handschoon, kallebas, krallentoér maake ‘t gehiël aaf. Gank op tiéd op paad en vraog um dich haer. Dök weite minse um dich haer net det eine adres veur eine moeie jas of ein winkelke mit tô?e stôf! Maar vergaet veural neet: ‘t is vastelaovend: gebroék kleur, humor (as dich eine doorslaag op diene bums wils zitte, môsse det veural doon!), glitter, schmink en eine lach en laot andere lache door dien verschiening. Want mit ein greekgezich steit d’r neemus leuk op!
Oeteraard zien d’r nog vuuël miër trends en struiminge op vastelaovesgebied! Dao euver de volgende oétgave miër!