Vastelaoves ‘App’ veur iPhone

Gister is beej Apple Nederland ‘t verzeuk gedaon um ‘n veur Venlo unieke app (applicatie), geneump ‘Vastelaovend’, te plaatse in de app store van Apple en beschikbaar te stelle aan idderein mit ‘n iDevice (iPod Touch, iPhone, en iPad). Op initiatief van twië enthousiaste jeugvastelaovesvereiniginge oét Venlo: Jocus Toekôms en de Herfshane en mit meiwerking van ‘n groët aantal vastelaovesgezelschappe, wao-onder netuurlijk auk de stadsvastelaovesvereiniging Jocus is ‘n interactieve app ontworpe.

Mit dit initiatief wuurt ‘n doelgroep aangespraoke dae opgreujd mit Twitter, Hyves, Facebook Linkedin, allemaol samegevat onder de neumer ‘sociale media’. Um middels dees sociale media de vastelaovend onder de aandach te bringe is ‘n app (programma) ontwikkeld veur de meis populaire smartphone: de Iphone van Apple. Dees app is euveriges auk te downloade veur andere Apple produkte wie de iPad en Ipod Touch.

Um d’rveur te zörge det d’r ‘n zoë groët meugelijk draagvlak ontsteit veur dees app is de samewerking gezôch mut alle vastelaovesgezelschappe binne de gemeinte Venlo. Dit is auk gelök. Jocus as stadvastelaovesvereiniging, maar auk andere wie: De Wortelepin, De Wuilus en ‘n fors aantal wiekvastelaovesgezelschappe hebbe meigewerk aan de tot standkômming van dees app.

In de app staon alle aktiviteite van de deilnemende vastelaovesgezelschappe in ‘n euverzichtelijke kalender en in chronologische volgorde veur ‘t kômmende vastelaoves seizoen.

Mit de app is ‘t meugelik um ‘n persuuënlikke planning te make van de aktiviteite die me wilt bezeuke. Vaerder is ‘t meugelik um twitterberichte te laeze van de gezelschappe, um zoë op de huuëgte te blieve van de letste ontwikkelinge en niejsfeite. Me kint foto’s en video’s bekieke en uploade en d’r is euver idder gezelschap informasie te laeze.

De verwachting is det de app veur 11-11 beschikbaar is in de app store van Apple. Det is afhankelijk van de tied dae Apple zich neemp um de app good te keure. De app wuurt gratis aangebaoje.