Van Gelder op Jocus’ Naopraote

Van Gelder is op 2 fibberwari tiedes ‘t traditionele Naopraote in de Maaspoort in Venlo de publiekstrekker. De Venlose band Van Gelder tummert al inkele jaore duchtig aan de waeg. ônlangs speulde de band tiedes de Nach van ‘t Limburgse Leed ‘t langste Limburgse leed waobeej de teks van “Bin d’r beej” gemak is door band en “’t publiek”. Daonaeve is d’r ein optraeje van ‘t duo Tiroler Teufel. Dit duo besteit oét Christian van Os en Roy Stekhuizen. Zeej hebbe al miër as 20 jaor ervaring waodoor idder optraeje ein fees wuurt.

De daag nao ‘t Boeremoosbal begint um 12.30 oor mit ‘t Krense. Dit is de resepsie van ‘t nieje boerebroélofsgezelschap de Kwas. Um 14.30 oor start ‘t programma van ‘t Naopraote.

Naeve van Gelder en Tiroler Teufel haet ‘t Naopraote dit jaor ‘n hiël moei program. Netuurlik zal ‘t nieje boerebroélofsgezelschap van de Kwas, mit in eur midde ‘t broédspaar Loes Peters en Evert Schnock, zich aan ‘t publiek prissentere. Ouk is d’r ‘n optraeje van Noud en Tim. Maar d’r is ouk niej talent. Zoë zulle de Herfshane weer van de partiej zien, aevenas de winnaers van ‘t Jocus Jeug Leedjes Konkoer, de kinder van de Schoël mit de Biébel. Netuurlik kin ‘t publiek weer geneete van de veer winnende Jocusleedjes. Veur dans en acrobatiek zörg de dansgroep van de Boereraod. De muzikale umliesting is in hand van de Prinsekepèl van Jocus.

Euveriges zien d’r nog inkele Boeremoosbalkaarte te koup det plaats vindt op zaoterdaag 1 fibberwari in de Maaspoort. Te koup beej Sporthuis Olympia aan de Groëte Baekstraot 1 in Venlo of via www.jocus.nl.