De regeerperiode van Prins Ruud II en zien Adjudante Bram en Jorg is al eine gas daag ônderwaeg. Hoëg tiéd veur eine tössebalans. Terwiel Adjudant Bram efkes op bezeuk is beej zien collega’s van ‘t Blariacum College, neme Prins Ruud II en Adjudant Jorg d’n tiéd veur ein flitsinterview.

Um mit de deur in hoés te valle: Wie geit ‘t mit ôg?
Prins Ruud II: "Oétstaekend! ‘t Geit hiel good, maar ‘t is gans anders as gedach. De kins dich van te veure ôngeviër ein veurstelling make, maar de intensiteit – in positieve zin – euversteig alles."

Adjudant Jorg: "Weej hebbe ‘t aafgelaupe waekind vuuël bezeuke gehad en hiél vuuël lol gehad. Euveral wao weej kômme waere weej wermtevol ôntvange. Weej waere geregeld genuuëjd um te zinge. De kriégs zoë vuuël reaksies, zoë spontaan. Dit is ech uniek."

Prins Ruud II: "Wie gek det ouk klink, maar alles is aeve leuk. ‘t Is ein aaneinschakeling van hoëgtepunte, idder bezeuk haet zien eige dimensie. Beej de verschillende recepties, maar ouk beejveurbeeld aafgelaupe zaoterdaag wie weej beej Hotel American zien gewaes: Jorg ziene pap Jan is d’r jaomer genôg neet miër en is same mit ome Baer Venlonaer van ‘t Jaor gewaes (in 1998 red.). In ‘t beejzien van Jorg zien breurs Richard en Michel hebbe weej eur ein hoésorde gebrach beej de wand wao alle Venlonaere van ‘t Jaor hange. Det waas ein hiél biezonder moment, kiepevel."

‘t Bal Maskeej van de Naate Raaf môt ouk vas biezônder gewaes zien. Wie waas det?
Prins Ruud II: Episch. De môs dich veurstelle desse mit ein maske op dien gezich in eine zaal mit eine dampende minsemassa binnekumps. ‘t Waas ech aafgelaaje. Tösse de gaetjes van de maskes zuusse nog net de ouge van idderein. Det waas hiél erg apart. Idderein waas oétgelaote, det waas zoë tof.

Noow kinne weej de leeje van ôg stamtaofel intösse ein bietje. Toch hebbe weej ein aantal van eur al döks mit vochtige ouge gezeen.
Adjudant Jorg: "Det is ech hiél apart. Asse ouk ‘t Bal Maskeej zuus. Zeej zien zoë gruuëts. Det waas ech super tof um same mit dien vrinde zo’n fees te make. Zelfs Vors Joeccius XI waas d’r in cognito. ‘t Waas ein groët fees.

Geej kint Venlo en Jocus alle dreej redelik good, maar wie liërt geej eur noow kinne?
Prins Ruud II: "Weej kinne eur al aardig, ouk door alle optraejes as zengers. Maar det op dees wiés te belaeve is prachtig. De kins dich van te veure van alles veurneme, maar ‘t moeiste zien van die ônverwachde momente. Wie weej beej Boéte de Paort wegginge hebbe weej in ‘t helke mit de Prinsekepel nog meziék gemak en mit alleman staon zinge. Det gebeurde spontaan. Det waas ech sjiek."

Adjudant Jorg: "Ouk beej de wiekvereiniginge is ‘t prachtig um te zeen waat dao gebeurt. Weej vinde ‘t ouk opvallend wievuuël bekinde d’r in ein dreejspan zitte.  As veurbeeld: van de zes jeugleiders van de minipupille van Venlosche Boys is Erik Hendrikx adjudant beej Boéte de Paort, Niels van den Ham is Höfkeuning en ik zelf bin Adjudant beej Jocus. Det guuëf eine speciale band.

Prins Ruud II: D’r gebeurd zoëvuuël in de Venlose Vastelaovend en beej Jocus. Dao haesse haos genne weit van waat d’r beej kump kiéke um det veur de minse allemaol meugelik te make. Dao as Jocus Dreejspan op bezeuk te gaon is hiel speciaal."

Hild Bram ‘t ouk ein bietje vol?
Adjudant Jorg: "Jaozeker! Dao zit weinig rem op, haha, al wet hae zien maot waal. Dus weej halde mekaar good in aevewich. En gelökkig hebbe weej nog eine lange tiéd te gaon."

Heb geej nog waat in ‘t vaat zitte veur de kômmende daag?
Prins Ruud II: "Weej laote ‘t eigelik euver ôs haer kômme. Al zien d’r waal ein paar dingkskes. Beejveurbeeld ‘t kroegetochje mit de Waus van kômmende vriédaag. Zeej hebbe zich nog röstig gehalde eigelik, dus weej zien beniejd. Maar ouk de Boétezitting van zaoterdaag en neteurlik de Groëten Optoch spits ik mich hiël erg op."

En zoë huurt det ouk. Want dit is allemaol nog maar veurspel, d’n echte Vastelaovend môt nog gaon beginne…

Alle belaefenisse van ‘t Jocus Dreejspan 2015 zien te volge via:
Website: www.jocus3span2015.nl
Twitter: www.twitter.com/@jocus3span2015
Facebook: www.facebook.com/jocus3span2015

(Foto’s VG De Törvers, Ben Janssen en Richard van der Meij)