’t Moeiste maedje van de waereld

De niejste Venlose vastelavesschlager van 2011 hit ’t Moeiste maedje van de waereld. ‘t Nummer wuurt gezônge door Gé en Rob Deenen en is geschreve door Wim Roeffen.  Op de twiëde plaats eindigde Dao kinse hônderd mei waere van Vic en Marius Suiker en Mark en Petro Janssen, gemak door Frank v/d Broek en Hay Geritz. De derde plaats waas veur de zengers Marcel Verdellen en Paul Joosten en teksschriéver Wim Roeffen mit eur Ooh Marjanne. Veerde woorte de debutante Noud Janssen en Tim Peeters mit eur eige gemakde leed Aom genog.

Jocus’ veurzitter Harry Pouwels is hiel tevreeje mit ‘t indrissultaat. “Asse nao de punteverdeiling kieks, dan zuuse det idderein d’n aovend weer vanoét ‘n ander perspectief belaef. De nummer 1 woort mekkelijk meigezônge en iddere Venlonaar herkint zichzelf waal in de romantische teks”.

Gé Deenen is hiel erg bliej. “’t Is geweldig det ik same mit mien broor dit meug belaeve. Ik weer woensdaag 50, staon dit jaor 30 jaor op de buun en ‘t leedje is spesjaal veur Ineke, ’t moeiste maedje van de waereld.

De veerde plaats is dit kiër weggelag veur twië jônge “herfshane”, Noud Janssen Tim Peeters hebbe vurrig jaor beej de Herfshane de 1e plaats behaold mit eur Naatje Pet.”En det smakde nao miër” alzoë Tim Peeters. “Weej zien allebei pas 22 jaor en dan waere we geliek veerde mit ’n leedje waat we zelf hebbe gemak”. Det zeej zelf ’n leedje hebbe geschreve veur de Opus Jocus kump door Frans Pollux. “Ik bin nao ze toe gegaon en heb veurgesteld dat ik ‘n leedje veur eur zoel schriéve as zeej d’r zelf auk ’n zoele kômponeren”, aldzoë Pollux.

’t Leedje ontstônd ind april in Spanje vertelt Noud Janssen. “Ik studeer in Spanje. ‘t Leek ôs waal ’n kwant idee um op ‘t Spaanse strand ‘n leedje te schriéve en dus kwaam Tim nao Alicante. En mit vuul plezeer en feeste is ‘t nummer gebaore”.

Frans Pollux is erg bliej mit ’t indrissultaat van de jônge artieste. “De Herfshane biedt jôngere ‘n liëgdrempelig podium um te laote zeen waat ze kinne. En asse talent hebs dan kinse zoëmaar doorstuime nao de groëte Jocusbuun”.