‘t Golde ei

‘t Golde ei – 4 jannewari 2013 in Kefee de Locomotief

Inmiddels zien weej aangekômme in ‘t tiënde (jao?) seizoen van de Herfshane. Veur wae ôs nog neet kint, weej zien ein stichting die de Venloosche jeug mit ein vastelaoves hert ein bühne biedt.

Idder jaor weer laote verschillende deilnemers wies ein jaor of 21 zich klaor stoume door corrifeeje oét de Venloosche vastelaovend. Klaor stoume veur ‘t echte werk. Ein zelf geschreve vastelaovesleedje of eine eige buut. Dit liére zeej door ‘t volge van masterclasses aan de veuraovend van ein nie vastelaovesseizoen.

Idder jaor inkele waeke veurdet de vastelaovend loos geit in ôs stedje van lol en plezeer organiseert stichting Herfshane eine feesaovend wao op de talente zich prissentere en eur leedje of buut ten gehuúre bringe. Door ein professionele jury waere zeej dan beoordeild. Dit seizoen is det op 4 jannewari. Dus noteer deeze datum op ôgge nieje kalender!

‘t Bliek waal det Herfshane neet zoëmaar vastelaovesvierders de buun op schuúf. Bekinde deilnemers zien Noud & Tim, die ouk dit seizoen weer op de Jocus CD staon. De winnaer(s) van dit seizoen meuge tiedes de Venloosche vastelaovend op verschillende plaatse optraeje en volgend jaor neme zeej ‘t stekske euver van de winnaers van aafgeloupe jaor. Want naeve Noud & Tim staon dit jaor ouk Lisa & Roos op de CD van Jocus!

Ziet geej net as weej beniéd nao ‘t vastelaoves talent det dit jaor schittert? Gank mei mit ôs op zeuk nao ‘t golde ei en kôm nao ôzze feesaovend op 4 jannewari in de Locomotief op de Parade in hertje stad!