’t Golde ei van 2015, op zeuk nao nie vastelaovestalent in Venlo
Stichting de Herfshane is alweer veur ‘t 10e jaor op zeuk gegaon nao jeugdig vastelaovestalent in groët Venlo. Schriévers, zengers, buutereedners, idderein haet zich kinne aanmelde veur de masterclasses. Maar leefs 10 enthousiaste talente hebbe zich aangemeld en zien bezig mit ‘t volge van de masterclasse.
De masterclasses zien gegaeve door muiekdocent Marinho Peter, bekind van de Venlose Revue en van vastelaovesband Linke Mik. Mit zien gitaar en aanstaekelik enthousiasme wet hae de jeugdige talente te vorme tot echte artieste. ‘t Doel van de Herfshane is det de deilnemers zoëwaal d’n teks as de melodie zelf bedinke, heejbeej waere ze intensief begeleid en gecoach. Same werke ze toe nao de artiestenaovend, heej laote ze eur eige creatie huuëre en zeen aan ‘t publiek. Ein deskundige jury beoordeilt welke act “‘t Golde ei” van 2015 wuurt. De winnende act meug op verschillende podia veur en tiédes de Vastelaovend in en rôndum Venlo optraeje! Daonaeve wuurt d’r veur d’n act mit de beste teks door de Stichting O.B.de Woers de Vaer de Woers oétgereik. As klapper op de veurpiél zal dit jaor ouk de Giel Aerts trofee aan ‘t Golde ei van 2015 waere oétgereik. Deze trofee steit veur de in Venlo en Limburg door Giel Aerts gecomponeerde ônmiskenbare schat aan “Vastelaovescomposities”.
Bisse niesgierig gewaore nao ôs talente? Kôm dan kiéke nao ôzze artiestenaovend op vriédag 9 jannewari vanaaf 19.30 oor in Café De Locomotief. Dan zuusse neet allein wae ‘t Golde ei 2015 wuurt, maar ouk de band Kwante Hippe en Noud en Tim! De entree is gratis. Wies dan!
Bekiek heej ‘t verslaag van JocusTV van ‘t Golde ei 2014: