‘t Echte onvervalste Môtteballebal weer truuk!

n 1988 woort veur d’n iërste kiër ‘t Môtteballebal georganiseerd. ‘n Aantal vastelaovesvrinde, wao-onder Herm Willems en ‘n aantal afgevaardigde van de joekskepelle Nuath en Kepelke Halluf Um. Doel waas ‘nnen bal te organisere veur de waat aldere jeug tösse 25 en 80+.

D’n bal meus voldoon aan ‘n aantal veurwaardes; d’r meus genôg ruumte zien zoëdet bezeukers eur originele kreasies en attribute koste toëne, de entreepriés meus neet te hoëg zien, d’r meus veural Venlose vastelaovesmeziek waere gespeuld, en de stadsprins meus op feestelijke wies waere onthaold.

Zelfs de stoutste verwachtinge woorte euvertroffe. Metein d’n iërste kiër waas de Môtteballebal oétverkoch en vanaaf det moment neet miër weg te dinke binne de Venlose vastelaoveskalender. Idderein in Venlo herinnert zich de reportage van Umroop Venlo wao verslaaggaever Wiel Hermans en cameraman Tom Ketelings in de meis komische situasies terech kwame. Eigenlik waas ‘t ‘n soort indoor optoch.

Nao de suksesvolle jaore waobeej ‘t bal steevast oétverkoch waas, leepe de bezeukersaantalle truuk. De organisasie haet geprobeerd door verniejing ‘t bal toch dreijende te halde. Zelfs de naam woort veranderd in “Pekskesaovend”. ‘t Sukses waas wisselend en opvallend genôg woorte de geluuje veur d’n echte onvervalste Môtteballebal steeds miër huurbaar.

Vurrig jaor haet de AZ-kemissie van Jocus, organisator van ‘t bal beslaote um de naam Môtteballebal weer in alde glorie te herstelle. Mit sukses, want de bezeukersaantalle stege weer. Dit jaor vindt ‘t evenement veur de 23e kiër plaats. Pas in ‘t twiëde jaor woort ‘t evenement door Jocus geadopteerd.

‘t Môtteballebal is op 11 fibberwarie 2012 in de Venlonazaal. Kaarte koste €11, wao de bezeukers maar leefs vier konsumpties beej oét kriége. De kaartverkaup is op dinsdaag 31 jannewarie um 20 oor en op zaoterdaag 4 fibberwarie um 12 oor in Café In d’n Dorstigen Haen in Venlo.