In memoriam: d’n hiër Sjraar Peetjens

Vanmorge bereikde ôs ’t dreuvige niejs van ’t haergaon van Sjraar Peetjens. Sjraar is 96 jaor gewaore.

Sjraar waas vanaaf 1946 lid van Venloosch Vastelaoves Gezelschap Jocus en haet jaorelangk as Jocus Hofzenger mit zien gôlde stum de Jocusleedjes op zien allermoeis laote klinke. Daonaeve makde hae in de fiéftiger jaore same mit zien broor Piet, Frans Boermans en Wiel Seelen furore mit de parodiegroep “De Straotzengers”.

De aafgeloupe jaore haet Sjraar nog döks de vastelaovesbuuns beklômme same mit Minsekinder. Mit dees optraejes bereikte hae auk de jôngste generaties en woort hae auk veur eur ein leechtend vastelaovesveurbaeld. Zien stum klônk auk in die letste jaore, ôndanks ziene ziër hoëge laeftiéd, nog steeds zoëwie de Venlonaere zich die altiéd zulle herinnere: loepzuuver en vol joeks en laevesplezeer.

Aafgeloupe jaor nog waas Sjraar unne haufrolspeuler in de documentairefilm “Nao ’t Zuuje”. Dao-in kwaam hae oétgebreid aan ’t woord euver zien passie veur meziék, de Venlose vastelaovend en de leefde van zien laeve.

Weej winse det hae zien rös meug vinde noow hae weer same is mit zien Ria en det al zien vastelaoveskammeräöj in de hemel nog döks van zien prachtige stum meuge geneete.

Mit deep respèk gedinke weej Sjraar Peetjens.

Stad van lol en plezeer, 27 jannewarie 2019

Names Venloosch Vastelaoves Gezelschap Jocus

Vors Joeccius XI
Roel Versleijen