Sef Gubbels krieg hoëgste Jocusonderscheiding

Sef Gubbels haet zaoterdagaovend tiédes de Groëte prônkzitting van Jocus oét hand van Jocusvors Harry Pouwels de hoëgste Jocusonderscheiding gekrege; de orde van de Zwalm. Sef Gubbels haet ‘n enorme staot van deens. Neet allein beej Jocus, maar auk beej andere Venlose vereiniginge, veural op muzikaal gebied. Auk zien andere werkzaamhede op sociaal niveau make Gubbels tot ‘nne unieke persoën wao Jocus en Venlo gruets op meuge zien.

Sef Gubbels is 34 jaor lid van Jocus. Daomei is hae ein van de aldste leeje van ‘t Venloosch Vastelaovesgezelschap. Van dees 34 jaor is hae maar leefs ein kwart iëuw lid van de Jocus Joekskemissie. As veurzitter van de muziekkemissie is hae de groëte animator van de jaorlikse Jocus-CD.

Maar leefs 26 jaor is hae de motor gewaes van de Jocus Hofkepel, ein ziér verdeenstelik showorkes waat boéte ‘t vastelaovesseizoen as Mixx door ‘t laeve geit. Inmiddels haet hae d’n dirigentstok euvergegaeve aan Wim Schreurs. Sef is auk de oprichter en leider van de neet miër weg te dinke Prinsekepèl van Jocus.

Gubbels is ‘nne verdeenstelikke arrangeur, componis en/of teksschriéver van diverse vastelaovesleedjes. Al diverse maole is hae, aan allebei de kante van de Maas in de priéze gevalle, mit as hoégtepunt ‘t winne van ‘t LVK in 1997 mit ‘Had ik maar’.

As veurzitter van de Jubel-muziekkemissie haet deze Jocusveteraan ‘n groëte beejdrage geleverd beej de samestelling van de Jocus Jubelnachte, ‘nne absolute topper in Jocus-historie.