Schmienke veur d’n optoch – tips van Josje
Maondaag 10 fibberwari 2014
Waat is d’r leuker as nao d’n Optoch kiéke? Meiloupe netuurlik! En dan zien d’r ein paar dinger wao-se mit diene schmienk raekening mei môs halde. Asse dees tips opvolgs, zitse in de zjurering zeker beej de beste hônderd van d’n Optoch!
- Op de iërste plaats maak zo’n ontwerp, det ‘t ouk van ennen aafstand good te zeen is waat desse haes geschmienk, dus neet te fien. Neet idderein steit veuraan nao d’n optoch te kiéke en ouk de minse die achteraan staon op de Parade of die örges oét eine raam hange, wille dich zeen. En dich wils dich netuurlik ouk aan eur laote zeen!
- Vaerder: gebroék kleure die ouk in dien pekske truuk kômme. Dan haesse ein gehiél en de minse zeen ouk, desse d’r euver hebs naogedach!
- En tot besloét: maak ‘t ontwerp neet te meujlik. Dich wets wie det geit: d’n daag veur d’n optoch is ‘t ouk al hiël gezellig, dus van op tiéd nao hoés gaon is niks gekômme. Maar de môs waal op tiéd klaor zien veur d’n optoch.
En as dien ontwerp neet zoë hiël meujlik is, kinse in idder geval ‘n oor langer bliéve ligge!
Ammezeer ôg!