Roëje Kruutszitting gered

Lange tied waas ‘t spannend. Zoel de Roëje Kruutszitting kômmend jaor waal of gen doorgang kinne vinde? Vanmiddaag kwaam ‘t verlossende waord. Jocus en Kiwanis Club Venlo Sintermerte hebbe mit sukses ‘n reddingsplan opgesteld en eur belangeloze meiwerking toegezag. ‘t Komité det jaorelangk zörgdroog veur de Roëje Kruutszitting, ‘n fantastische vastelaoveszitting veur lichamelijk en verstandelijk gehandicapte, zoog ‘t neet miër zitte. As gevolg van sterfgevalle en krankheid waas ‘t komité gereduceerd wies 2 persoëne, die zich genoëdzaak zooge de noëdklok te luuje. Gaer woele zeej auk dit jaor weer veur ‘n fantastisch evenement eur inzet toëne, maar in dees beperkte bezetting zoel det zeker neet miër gaon lökke. D’r ware al verplichtinge aangegaon, maar beej gebrek aan genôg organisatorische hölp, ondersteuning en finansjele zekerheide koste zeej neet anders dan besloéte det alles woort aafgeblaoze. Vuul teleurstelling sprook oét ‘n groët aantal reaksies.

Dit signaal is de aafgelaupe daag opgevange door Jocus en serviceclub Kiwanis Club Venlo Sintermerte. Beide organisasies vonde ‘t onverteerbaar as ‘n prachtig initiatief wie de Roëje Kruutszitting verlaore zoel gaon. Raeje waorum zeej schouwer aan schouwer intensief hebbe samegewerk aan ‘n reddingsplan. Vanmiddaag woort duddelijk det ‘t geit lökke. “De Roëje Kruutszitting 2010 geit door”, zoë meldde zeej twië. De organisatorische kwaliteite en de vastelaovesslaagkrach van Jocus in kombinasie mit finansjele inspanninge en ‘t netwerk van de Kiwanis Club Venlo Sintermerte bôrge daomei ‘n prachtige volkskulturele middaag veur ‘n hiël biezondere doelgroep. Vuul artieste en meiewerkers hebbe inmiddels al eur belangeloze inzet veur deze middaag toegezag.

De middaag vindt plaats op zaoterdaag 6 fibberwarie 2010 vanaaf 13.00 tot wies 17.00 oor.Lokasie: de Maaspaort in Venlo.