René Hovens, nieje Chef du Protocol Jocus
Sinds september 2012 is René Hovens de nieje Chef du Protocol van ‘t Venlose Vastelaovesgezelschap Jocus. Hae volg daomei Frans Aerts op, dae jaorelangk ‘t reile en zeile van ‘t ‘dreejspan en de Raod’ verzörgde. René Hovens is via vrindeclub de Frette beej de kemissie Algemeine Zake (AZ) van Jocus gekômme. “Det waas in ‘t jaor 2000, ‘t jaor van Prins Harry Pouwels”, aldus de nieje chef. “Mien iërste werkzaamhede beej de AZ ware de kaartverkoup en ‘t begeleide van ‘t Boérebroélofsgezelschap”.
Vurrig jaor kwaam Vors Joeccius XI, Harry Pouwels, nao René mit de vraog of hae de nieje Chef du Protocol woel waere. “De Vors zag det Frans Aerts mich hiël gaer as zienen opvolger woel hebbe”. Det Aerts det woel is neet zoë vraemp want Hovens is al sinds 2001 inspeciènt, Frans veur materiaalman. Einen inspeciènt beej Jous druuëg zörg veur mutse, witte kraeg, paraplu’s. Hae is ouk ein van de chauffeurs. Vaerder ôndersteunt hae de Chef du Protocol. “Waat det betref weit ik al waat noow van mich verwach wuurt”, zaet Hovens.
De belangriékste taak van de Chef du Protocol is d’r veur te zörge det de leeje van de Raod, Prins en adjudante beejein bliéve. “Vastelaovend is netuurlik klasjenere, same ein präötje make” en det beteikent det ‘t belangriék is det eemus let det de club beejein blief”. Daobeej mak Hovens ouk ‘t programma van Dreejspan en Raod. “ ‘t Is belangriék desse de verschillende tieje van bezeuke good doorneemps en desse wets wievuuël ônderscheidinge desse mei môs neeme”. ‘t Protocol, de gedragseuvereinkôms, beej Jocus umvat ein kleidingprotocol, ein intochprotocol veur binnekôms in eine zaal en ein podiumprotocol. “’t Protocol zörg d’r dus veur det idderein wet waat hae môt doon.”.
De Chef du Protocol regelt ouk de remplaçante veur de Raod. Dit zien ald-adjudante die raodsleeje vervange beej aafwezigheid. Dit jaor velt ouk de prinsegarde en de dansmarietjes ônder zien leiding. “Ach en zoë zien d’r tal van zake die ik regel. De zoels mien werk beej Jocus misschien ‘t beste kinne vergeliéke mit einen tourmanager van eine klassieke zänger,” aldus de kersverse Chef du Protocol.