RemmieDemmie oorkônde veur Joekskepelle

Venloosch Vastelaoves Gezelschap Jocus geit dit jaor veur ’t iërs de RemmieDemmie oorkônde oétreike aan ein joekskepel die tiédens de groëten optoch ’t kwantste veur d’n daag kwaam.

’t Ingeliésde kunswerkske is ôntworpe door Geert Verkoeyen van Jocus’ TC.

Joekskepelle huure al jaore beej de mezikale sfeermaekers in ôzze Groëten Optoch en de Venlose Vastelaovend dus is ’t d’n hoëgsten tiéd det ze det ouk ens te huure kriége. 
Dezelfde jury as veur de wages en de groepe in de Groëten Optoch zal eur bespiénze, beluustere en beoordeille. 

Oétgangspunt heejbeej is de totale oétstraoling van de Joekskepél.
De winnaer wuurt nao de Groëten Optoch in de Maaspaort bekind gemak geliék met de wages en de groepe.

Um d’r good aandach aan te kinne gaeve wuurt de RemmieDemmie oorkônde oétgereik tiédens de oétbetaal zôndaag op 18 fibbrewarie beej De Witte op de Parade.

De Groëten Optoch van Jocus trek op vastelaovesmaondaag vanaaf 13.00 oor door de Venlose binnestad. De Optochopstelling vindt geej heej.