Record aantal aanmeldinge JVLK
t Jeug Vastelaoves Leedjes Konkoer (JVLK) wuurt op 21 fibberwari gehalde mit maarleefs 8 deilnemers. Det is ’t hoëgste aantal sinds jaore. “Det vervölt Jocus Toekôms mit gruuëtsigheid. Dit jäörlikse evenement, speciaal bedoeld um de vastelaovestradities door te gaeve aan de jôngste ginneraties, tuuënt opniej wie laeventig en belangriék de Venlose vastelaovesköltuur is.”
Same leedjes make
Jocus Toekôms organiseert ’t JVLK jäörliks veur basisschoële. Klasse waere oétgedaag um same ein eige vastelaovesleedje te make. Onder begeleiding van Wim Roeffen, dae alle melodieje in dreej tuuënhuuëgtes beschikbaar stelt, werke de schoële zelf aan eur inzending. De schoële schriéve neet allein euren eige teks, maar verzörge auk de oétveuringe waobeej kreativiteit en betrokkeheid centraal staon. ’t Winnende leedje ôntvingk neet alleein de felbeerde priés ‘D’n Bart’ veurneump nao ein van de initiatiefnemers Bart den Biesen, aevel auk ein plaats op de officiële Jocus CD.
Daonaeve meuge de winnaers optraeje op verschillende Jocus en Jocus Toekôms evenemente.
Riéke traditie
’t JVLK kint ein biézondere geschiedenis. ’t Initiatief woort jaore geleeje gebaore beej Bart den Biesen, Wim Roeffen en Johan Hendriks, same mit Bert en Herm Pollux. Eur doel waas um de jeug te betrekke beej de vastelaovend en eur de költurele waerd mei te gaeve.
“De Venlose vastelaovesleedjes hebbe vuuël inhald, vuuël miër as de Hollandse leedjes,” vertelt Herm Pollux. “’t Geit neet allein um de stampmeziék, aevel um de leedjs mit beteikenisvolle tekste die de tradities in laeve halde. Daorum zien die Venlose leedjes zoë populair gewaore, zelfs boéte Venlo.”
De organisatie van ’t JVLK is inmiddels in vertrouwde hande van Jocus Toekôms, mit ondersteuning van ein deskundige sjurie, wao-ônder Herm Pollux, Marian van den Ham en de dreejspanne van Jocus en Jocus Toekôms. ’t Evenement wuurt georganiseerd veur de jeug, door de jeug.
De finale van ’t JVLK hae plaats op vriédaag 21 fibberwari, wao de deilnemende schoële eur kreaties zölle bringe. ’t JVLK is toegankelik veur de deilnemende klasse.
Alle deilnemers hiël vuuël succes!