Prônkzitting Jocus 2012

Met in de Superbuut: Pierre Cnoops, Ger Frencken en Pierre van Helden

De kômmende Prônkzitting van Jocus, op 17 november in de Maaspoort in Venlo, zal in ‘t teike staon van ‘nnen echte superbuut. Maar leefs dreej Limburgse buutkampioene staon same op Jocus-buun. Pierre Cnoops, Ger Frencken en Pierre van Helden hove waat det betref gen introduksie. Al decennia bringe zeej de minse in de zaal aan ‘t lache.

Mit ‘n aafwisselend programma vol dans, zang en kabaret wet Jocus weer ‘n gevarieerd aovendvöllend programma te verzörge. Naeve de superbuut geit ‘t publiek geneete van vuul vastelaoveskabaret. ‘t trio Ongeplök en Ruud Stikkelbroeck mit de “bôks” stelle weer allerhande zake op humoristische wies aan de kaak.

Voor dans en acrobatiek zörg de dansgroep de Grün Weisse Funken. ‘t Publiek kin geneete van de döks halsbraekende en acrobatische danse van de Tanzgarde oét Merzig in Pruuss. De meziek is in hand van Jocus Hofkepèl. Netuurlik ontbraeke de veer winnende Jocusleedjes neet.

De Jocus Prônkzitting wuurt ‘t letste optraeje van Prins Jeroen I met zien adjudante Barry en Quinn. Zeej zulle aafscheid neme en op waeg gaon nao de Prinsehemel. D’r zien nog inkele kaarte te kaup beej Sporthuis Olympia, Groëte Baekstraot 1 in Venlo en koste €22.