Op maondaag 11 november geit ‘t hert van alle vastelaovesvierders flotter kloppe. ‘t Is weer Elf van Elf. Daorum knalt ‘t kenôn op maondaagmorge precies um 11.11 ten teike det ‘t vastelaovesseizoen is geäöpend. Vors Joeccius XI en ‘t Venloos Vastelaovesgezelschap Jocus en Börgemeister Scholten van Venlo losse de startschote waonao de Prinse van de Venlose zustervereiniginge ‘t euverneme.
Ter iëre van d’n Elfde van d’n Elfde organisere VVG Jocus en Stichting Horeca Altstad in Venlo (de kasteleins rônd de Mert en de Steinstraot) ouk dit jaor weer ein groët äöpeningsfees op de mert veur ‘t stadhoés in Venlo.

Alle vereiniginge

Naeve Jocus mit ziene Prins Sef IV zien ouk alle wiékvereiniginge aanwezig. Vors, Prins en Adjudante en iddere Raod van Elf van De Wien, De Moeraskwakers, De Vaegers, Vogelhut, Boéte de Paort, Jocus Toekôms, De Törvers, De Gaaskaetel en De Kwas zulle allemaol in vol ornaat acte de présence gaeve um te geneete van deze biezônderen daag.

Biezôndere Opstaeker mit meziék

Op de Elfde van d’n Elfde wuurt de nieje Opstaeker geprissenteerd. ‘t Is ein biezônder ôntwerp in de vorm van ein Dansmerieke. Dit jaor is de vastelaovesbroche ôntworpe door kunsschilder en illustrator Leon Peeters. Nao dees prissentasie zal d’n Opstaeker in ‘t zunke waere gezatte door Minsekinder. De populaire groep zal euren hit  ‘Dansmerieke’  speule. Ein initiatief van Oeles, Belhamels, Jocus en Wortelepin. D’n Opstaeker gif bliék van waardeering veur de vuuële hônderde vreejwilliggers. Daobeej is ‘t ein verzamelaersobjek. D’n Opstaeker is eigelik ônmisbaar op idder pekske.

Langste leed van Limburg

Biezônder is ‘t feit det d’n band ‘Van Gelder’ ‘t langste leed van Limburg geit oétveure. BindrB het ‘t projek  waobeej  idderein in d’n aafgeloupen tiéd is oétgenuuëdig um ein couplet te schriéve. Op de nach van ‘t Limburgse leed woord dit leed veurgesteld en op Elf van Elf staon ze weer op de Jocus bühn same mit inkele componiste die eur eige couplet gaon zinge.

Artieste

Eine ganse stoet van artieste zal zörge veur ein feestelikke stumming. Netuurlik speult ouk de Jocus Hofkepel live op ‘t podium.  Maar leefs 4 bands staon noow al te popele um de bezeukers aan ‘t zinge en swinge te kriége. En alle artieste en bands kômme oét de eige regio!
 Miër dan 30 artieste zörge mit de bands en de Hofkepel veur ein programma det um 11.00 begint en pas um 19.00 indig. Tenminste op de bühn. Daonao zal ‘t fees in de café’s rônd de Mert en de  Steinstraot doorgaon.

CD

Meziék neet allein live op ‘t podium, maar ouk um mei nao hoés te neme. De nieje Jocus CD zal as iërste aan Hoëgheid Sef IV waere oétgereik. Mit dao-op de veer winnende ‘leedjes’ van d’n ônlangs gehalde leedjesaovend Opus Jocus. Alle veer waere ouk nog ens live gezônge.

Elf van Elf, dan kumpse toch zeker zelf!
Tot kiék op de Mert op d’n elfde van d’n elfde 2013 um 11.00