Prinse-Poule is weer gestart!

Sinds 11 november kin iddere Venlonaer weer ‘n goei doon nao wae ‘t Jocus-trio van ‘t nieje seizoen zal waere. ‘t Zoëgeneumde Prinse-Poule is weer gestart. ‘t Trio det tiédes d’n Hofbal op 19 jannewarie bekindgemak wuurt, helt de Venlose gemoedere al maonde van teveure bezig.  Heej op ’t thoésblaad kint ge ‘t trio van ôch keuze kinbaar make. In de wandelgange wuurt d’r vuul euver gespraoke en waere d’r zelfs weddeschappe aafgeslaote op dit bes bewaarde geheim van Venlo. Sommige hebbe ‘n vermoede, anderen dinke ‘t zelfs zeker te weite. “Prins Carnaval is ‘t gezich van det seizoen. Hae is de dirigent van de joeks en jen veur jôngk en ald. De Prins is ‘t brandpunt van de Venlose vastelaovend”, alzoë Vors Joeccius XI. Wies 19 jannewarie is hae ein van de weinige dae ‘t zeker wet, veur alle euverige Venlonaere blief ’t oétintelik ‘n verrassing.

Sinds de start van dit thoésblaad, zô’n 11 jaor geleeje, hebbe ruum 400.000 minse eur waeg gevonde nao ’t digitale thoés van Jocus. De aafgelaupe jaore zien d’r ongeviër 1000 minse per jaor die deilneme aan ‘t Prinse-Poule. “De absolute topdaag kwa bezeukers waas d’n Hofbal in 2005. Tegeliek mit ‘t oétroope van Prins Fred I bestond namelik auk de meugelikheid um ‘t inmiddels legendarische leed “De Prins van iddere mins” te downloade. Dae dag hadde we maar leefs 4000 hits”, zaet Jocus-webmeister Clim de Boer gruuëts. “We ware in ein klap landelijk kopluiper in de kategorie ‘Vereinigings-sites’. ’t Thoésblaad van Jocus bevat inmiddels ‘n schat aan weitenswaardighede, mit ‘n apart deil veur de pers, de meugelijkheid um merchandising via de digitale snelwaeg te kaupe en kaarte veur evenementen te bestelle en ‘n eige “extranet” veur ‘t bestuur, alle kemissies en euverige leeje van de vereiniging.