Prins Sef VI

Op d’n Hofbal goof Vors Joeccius XI gruuëts bekindheid aan Prins Carnaval 2013 in ‘t Jocus Riék: Sef (IV) Thissen, mit zien adjudante Roel Bisschops en Marc Derckx.

Prins Sef Thissen (39) is getrouwd mit Leta Bell en de gruuëtse pap van dochter Loepy (13). Weej kinne Sef as klassiek zenger (bariton), prissentator van Navenant TV en as de bedinker van Viva Classic Live. Sef zuut zien werk auk zien hobbie. Zien broor Hay waas in 1998 prins carnaval beej Jocus.

Adjudant Roel Bisschops (38) is getrouwd mit Suzanne Pasmans. Zeej hebbe ‘nne zoon: Vincent (3). Roel is same mit zien broor de eigenaer van Bisschops Schildersbedrijf en Muysers Glas en Verf. Zien hobbies zien: vekansies, skieje, kaoke en lekker aete, laeze en voetbal kiéke. Roel is de penningmeister van de Stichting Vrinde van Jocus, vaerder bestuurslid beej de Cuisine Culinair Noord Limburg (CCNL), meide-organisator Sportgala Venlo, meide-organisator Viva Classic Live Venlo en penningmeister van Ald Vos 3.

Adjudant Marc Derckx (37) is getrouwd mit Astrid Roest en zeej hebbe same twië jônges, Tuur (5) en Gies (3). Marc is belastingadviseur beej Administratiekantoër Huub Jessen. Haet haet as hobbies: kaoke, bikke, ein good glaas wien mit vrinde en daorum auk aaf en toe hardlaupe.