Menu

Opus Jocus veur d’n 13e kiër live op Umroop Venlo

Truuk nao euverzich
Dich bis noow heej: Thoés > Opus Jocus veur d’n 13e kiër live op Umroop Venlo
Zaoterdaag 21 september 2013

Kômmende zaoterdaag 28 september zal Umroop Venlo, in samewerking mit Jocus en Lagotronics, veur d’n 13e kiër d’n Opus Jocus live op tillevisie oétzende. Oét 34 inzendinge zien aafgeloupe zomer elf nummers gekaoze. Kômmende zaoterdaag prissentere de zengers en zangeresse van dees finaleleedjes zich aan ‘t Venloos en Noord-Limburgs publiek. Op deezen aovend debutere maar leefs veer nieje artieste, wao ônder ein jeugdige zangeres Daisy Gasbersz. Opvallend zien ouk de name van ald Vors Joeccius XI, Toine Hazenbosch en ald raodslid Jan Klein.

De elf finaliste zien:

  1. Veurbeej, door: Ruud Stikkelbroeck – Fred Honig – Bart Houtermans – Robert Bouten.
  2. Vastelaovend same, door: Frank Donders.
  3. De vastelaovesbloom, door: Daisy Gaspersz.
  4. Beginnersgelök, door: Jan Klein – Toine Hazenbosch.
  5. Det hebbe weej weer, door: Mark Janssen – Petro Janssen –  Marius Suiker – Vic Suiker.
  6. ôs stadsgezich, door: Claar Boots – Frans Driessen.
  7. Det hebbe weej weer, door: Fred Honig – Bart Houtermans.
  8. Straol!, door: Bibian Baur – Rian de Jong – Ingrid Dambacher.
  9. Vastelaovesgelök, door: Mark Janssen – Petro Janssen – Marius Suiker – Vic Suiker.
  10. De wind, door: Ruud Stikkelbroeck – Fred Honig – Bart Houtermans.
  11. Manne meine, door: Mirjam van Elderen – Jozanne v.d.Velden – Bernie Billekens – Simone Driessen.

De tekste zien heej te downloade: http://www.jocusvenlo.nl/leedjes_opusjocus.asp

Opus Jocus wuurt meugelik gemak door maar leefs 154 meiwerkers. Volges Ton Lamberts, veurzitter van de Jocus Joekskemissie, werke professionals en amateurs op ein perfecte meneer same. “Dit jaor hebbe we gekaoze veur ein nieje meneer van prissentasie, laot ôg dus verrasse.”

D’r zien nog inkele theaterzaalkaarte te koup. Euverigs waere de minse in d’n theaterzaal ouk van consumpties veurzeen. De letste kaarte zien te koup via ‘t thoésblaad van Jocus of beej Sporthuis Olympia aan de Groëte Baekstraot 1 in Venlo. De entreebewiéze koste € 17,50.

De leedjesaovend van Jocus is ein samewerkingsverband tösse Jocus, Lagotronics en Umroop Venlo. De veer beste leedjes kriege ein plek op de nieje Jocus-CD die vanaaf 11 november te koup is. Miër informatie euver Jocus en alle Jocus-evenemente is te vinde op www.Jocus.nl.