Opus Jocus Leedjesaovend 2014 verniejd
Jocus Leedjesaovend wuurt verniejd. Zoë is ônder andere ‘t wedstrijdelement verniejd en krieg ‘t publiek ‘n groëtere rol beej ‘t stumme. Ouk zien de leedjes veuraafgaond aan Opus Jocus 2014 via Umroop Venlo al te zeen.
Heejdoor löp de Leedjesaovend flotter en is hae anders van opzet zoëdet de formule in de toekôms vaerder kin greuje. Dit pas in ‘t straeve van Jocus um, mit inachneming van de tradisies, te bliéve vernieje. Zoë woorte de aafgeloupe jaore ônder andere de Groëten Optoch op Vastelaovesmaondaag, ‘t Staatsorgaan De Träöt en de Groëte Prônkzitting van niej elan veurzeen.
Tiedes Opus Jocus Leedjesaovend strieje elf leedjes um “de Funs”. Nao d’n iërste rônde gaon zeve van de leedjes wiejer veur ‘n felbegeerde plaats op de nieje Jocus CD. Die op Elf van Elf zal verschiene.
Uniek is, det op zaoterdaag 27 september de leedjes op Umroop Venlo TV in ein speciaal programma te zeen zien. Auk zien de leedjes, wies aan de leedjesaovend op zaoterdaag 4 oktober, dageliks te beluustere op Umroep Venlo radio. Op dees wiés kinne de zjuries en ‘t publiek alves geneete van de elf finaliste.
‘t Publiek krieg ein groëtere rol in de zjurering: ‘t is meugelijk um via sms te stumme op ôch favoriete leedje. Daomei vorme de minse thoés en in de kefees ‘n extra stumburo. Sprik vanzelf det ouk de vakzjurie, zaalzjurie en de wiékzjuries eur stum oétbringe.
Daonaeve waere de zaalindeiling en ‘t podium verniejd: bezeukers zulle dit jaor in de zaal staon, zoë wie beej diverse andere Jocus evenemente. ‘t Publiek kin in ‘t decor van de Leedjesaovend geneete van ‘n aovendvöllend programma mit optraejes van ônder andere DaMaZoë, Thei en Marij, W-Dreej en Jocus’ Hofkepèl.
Kaarte zien te koup beej Theater de Maaspoort, Sporthuis Olympia Jan Klein, Slegterie Schreinemachters, Plus Benders Venlo en via www.jocus.nl. Opus Jocus 2014 vindt plaats op zaoterdaag 4 oktoëber in Theater de Maaspoort in Venlo en is live te zeen op Umroop Venlo tillevisie.
Volg de kômmende daag de berichgaeving op www.jocus.nl en de sociale media kanale van Jocus veur de name van de elf finaliste en miër informasie euver de kaartverkoup.