Nieje oétslaag Opus Jocus Leedjesaovend

Venloosch Vastelaoves Gezelschap Jocus
zuut zich genoëdzaak d’n oétslaag van Opus Jocus Leedjesaovend aan te passe.

Twië daag nao de wedstrijd woort Jocus geconfronteerd mit diverse meldinge euver meugelik plagiaat beej ‘t winnende leedje ‘Oppe Parade’.

Dao-op is onderzeuk gedaon nao de herkoms van ‘t leedje en kôntak gewaes mit Jeroen en Dennis, de zengers, teksschriévers en kômponiste.

Dao-oét is gebleke det ‘t leedje te vuuël euvereinkômste haet mit ein Pools leedje oét 2018 um van ein originele compositie te spraeke. Dao-op is beslaote um de inzending te diskwalificere en oét d’n indoétslaag te schrappe.
Jeroen en Dennis reageerde vanmorge: “Weej zooge de inzending as ein avontuur, maar woorte de aafgelaupe waeke euverromeld door de enthousiaste reacties en de professionele en massale produktie. Weej dachte neet miër truuk te kinne. Uiteraard herkinne weej ôs in dit besloét van Jocus en fillicitere de ‘nieje winnaers’.

De nieje oétslaag van Opus Jocus Leedjesaovend zuut d’r asvolg oét:

1e plaats: Weej Bliéve Wie Weej Zien, gezônge door Niels Vestjens, Jason Hafmans, Duncan Nikkelen, Dion Jeucken, Thuur Zumdick en Willem Koopmans. De teks is van Mirthe van Dijk en de meziék van Hay Geritz.
2e plaats: Doézend Kleure, gezônge door Marina Claessen. De teks is van Hannelore en Laurence Winter en de meziék van Jack Claessen.
3e plaats: Det Zelfde leedje, gezônge door Bart Janssen, Willy Billekens en Gijs Engels. De teks is van Peter Jansen en de meziék van Hay Geritz.
4e plaats: Soep van Mam, gezônge door Stan Schattenkerk, Sem Daemen, Sten van Lier en Sam Vervoort. De teks en meziék zien van Alwin Grijseels en Joop Aerdts.